مەسروور بارزانی گەورەترین پێشانگای گەشتوگوزار لە هەولێر دەکاتەوە

پێشانگای گەشتیاری رۆژھەڵاتی ناوەڕاست – ھەولێر لە ھۆڵی پێشانگای نێودەوڵەتیی پارکی سامی عەبدولڕەحمان بەڕێوەدەچێت و لە ئەمڕۆوە دەست بە کارەکانی دەکات و تاوەکو رۆژی پێنجشەممە ٨ـی ئایار بەردەوام دەبێت.

پێشتر وەزارەتی شارەوانی و گەشتوگوزار رایگەیاندبوو کە پێشانگاکە بە چاودێری وەزیری شارەوانی و گەشتوگوزار بەڕێوەدەچێت و کۆمەڵێک گەورە کۆمپانیای گەشتیاریی و تەکنەلۆژیی لەسەر ئاستی جیھان تێیدا بەشدار دەبن.

ئەو کۆمپانیایانەی لە سێیەمین پێشانگای گەشتیاریی رۆژھەڵاتی ناوەڕاست بەشداری دەکەن لە بوارەکانی گەشتیاری، خزمەتگوزاریی تەکنەلۆژیا و زانیاری، ھێڵی ئاسمانی و فڕۆکەوانی، کۆمپانیاکانی دڵنیایی، گواستنەوە و گەیاندن، ھۆتێلەکان، ھاوارگە و شوێنە گەشتیارییەکان و چەندین بواری دیکەدا کار دەکەن.