فیلمە فیستیڤاڵا دھۆک یا نیڤدەولەتی شورەشەکا کلتوریە

دھۆک-KDP.info- بەرپرسێ راگەھاندنا فیلمە ڤیستیڤاڵا دھۆک یا نیڤدەولەتی گوت، فیلمە فیستیڤاڵا دھۆک یا نیڤدەولەتی نە ب تنێ فیستیڤاڵەکا ئاسایی یە، ئەڤە شورەشەکا کلتوریە دێ دھۆکێ بەرەف جیھانەکا دی یا ھونەری و پێشکەفتنێ بەت.

خەونا پیرەمێرەکی کۆرد ھاتە دی ١١مین فیلمە ڤیستیڤاڵا نیڤدەولەتی ل دھۆک دەسپێکرییە ل پشت مێزەکێ  ل قەھواخانەیەکا کەڤن ل باژێرێ دھۆک پیرەمێرەکێ کۆردێ دھۆکی  ب حەسرەت بەرێ خۆ ددەتە تلەفزیونا بچویک ل کوژیێ بلندێ فەھوەخانێ و دبێژیت "بەری ٤٠ ساڵان  دیتنا فیلمەکێ کوردی وەکی خەونەکێ بوو دەم ل دەست  ئەو ئەڤرۆ ل بەر دەرێ سینەما ماکسا دھۆکێ راوستیابوو، ژبۆ دیتنا کورێ خۆ وەکو ئەکتەر دئێک ژفیلمێن کوردی یێن فلمە فیستیڤاڵا دھۆک یا نیڤدەولەتی دا. چیروکا دھۆکێ  چیروکا گھورینا جیھانێ یە ب رێکا فیلمان ل باژێرەکی کو بەری چەند ساڵەکێن کێم کەسێ نە دزانی گوتنا "cut" چییە،  ئەڤرۆ پتر ژ٣٠ وەڵاتێن بیانی پشکداری گەرا ١١ێ یا فیلمە ڤیستیڤاڵا دھۆک یا نیڤدەولەتی بووینە و وەڵاتەکێ وەکو ھندستانێ مێھڤان کرییە و سینەما بولیود ب بلوکەکێ فیلمان پشکدارە و نێزیک ٧٥٠ فلم ژبۆ فیلمە ڤیستیڤاڵێ ھاتینە ھەلبژارتن پشتی کو ژلایێ ژوریێن ڤیستیڤالێ ھاتینە ھەلسەنگاندن ٤٦ فلم ژوان بۆ بەشا فیلمێن کوردی و ٦١ فلم ژی بۆ بەشا فیلمێن بیانی ھاتینە دابەشکرن، کو ژتێکرایێ وان فیلمان ٨ فلمێن کوردی دگەل ٩ فلمێن بیانی دێ ھەڤرکیێ کەن ژبۆ وەرگۆتنا خەلاتی.

حەسەن فەتاح، پەیڤدارێ رێڤەبەرییا گشتی یا رەوشەنبیری و ھونەری یا پارێزگەھا دھۆکێ و رێکخەرێ فیلمە ڤیستیڤاڵا دھۆک یا نیڤدەولەتی ب ماڵپەڕێ فەرمیێ پارتی دیموکراتی کوردستان ڕاگەھاند:" فیلمە ڤیستیڤاڵا دھۆک یا نیڤدەولەتی پێنگاڤەکا مەزن یا شارستانیەتێ یە تێدا رەسەناتییا کولتور و زمان و دیروکا خۆ دیاردکەین، تایبەت کو دئەڤ ساڵەدا مژارا ڤیستیڤاڵێ وەرزشە، چونکە وەرزش و ھونەر وەک دوو چەمکێن ژئێک جودا سنوورێن وەڵاتان نانیاسن و ب بێ سنوور و ب بێ پاسپورت دەربازی ھەمی وەڵاتان دبن و کەلتور و شارستانییەتا وەڵاتان نیشان ددەن و دگەل ھندێ دا حەسەنی ھەردوو دەستێن خۆ پێکڤە ڤەکرن بلندکرن و گوت " تۆ دزانی چ تشتێ دی یێ سەیر ھەیە؟ کچەکا جحێلا دھۆکێ جینزەک و تیشێرتەک کو وێنەیێ شاروخانی ل سەربوو گوتە من، مە نەدڤییا ب تنێ بێین ژبۆ بەرێخودانا فیلمان، مە دڤییا بەژداری فیلمان ببین و فیلمان چێکەین، فیلمێ ڤەکرنێ یێ کوردی ب ناڤێ (ڤیڤی) ژدەرھێنانا دەرھێنەرێ کوردێ باکور (ئورھان ئینجە)یە، کو ل سەر ژیانا گوندان دروست کرییە، ل دەمەکێ فیلمە ڤیستیڤاڵا دھۆک دێ بوو ٨ رۆژان یا بەردەوم بیت و ل رۆژا ئێکێ ریوەرسمێن پرۆتوکولی دێ ھێنە ب رێڤەبرن ژبۆ ڤەکرنا ڤیستیڤاڵێ، و پاشان ب بەردەوامییا ٦ رۆژان ل سەر ئێک دێ نیشاندانا فیلمان بیت و رۆژا ٨ێ ژی دیسان رێوەرسمێن پرۆتوکولی نە ژبۆ دابەشکرنا خەلاتان ژبۆ فیلمێن سەرکەفتی.

ژدەرڤەی ھوڵا سینەمایێ ل سەر وێ مەحفیرا سور سەدان کامیرەنە و ئەکتەرێن بولیوودێ دگەل ھونەرمەندێن کۆرد وێنەیان دگرن، "ئەڤە نە ب تنێ فیستیڤاڵەکە" حەسەن فەتاح دبێژیت: "ئەڤە شورەشەکە  فیلمە ڤیستیڤاڵ رویێ ھونەری و کەلتوری یێ خەلکێ کوردستانێ و گەلێ کورد نیشا جیھانا ژدەرڤە ددەت و وەکو پلان و ستراتیجییەتا درێژ خایەن ئەڤ ڤیستیڤاڵە ل پاشەروژێ بشێت ھاریکاریێ ژبۆ ڤەژاندنا ژێرخانەیا گەشت و گوزاری و ئابووری بکەت و پاڵا سینەماکار و ھونەرمەندێن بیانی رابکێشیت ژبۆ بکارئینانا دیمەنێن کوردستانێ وەکو لوکەیشنێن فیلمێن خۆ و ب رێیا ڤێ زەمینە سازیێ رێکێ خۆش بکەین کو ژێرخانەیا سینەمایی پتر گەشێ بکەت چونکە سینەما کوردی ژلایێ بەرھەمئینان و ژێر خانێ ڤە ھێشتا دقوناغەکا ھەژار دایە لێ ژلایێ ڤیستیڤالی و رێکخستن و ب رێڤەبرنێ دقوناغەکا باش دایە و دئەڤێ ڤیستیڤاڵێ دا فیلم ساز و دەرھێنەرێن گەنج و ئەکتەران کووم دکەت کو ئەو ژی دبیتە ئەگەرەک ژێرخانەیا فیلمان باشتر ببیت."  

دناڤا وێ سالونا مەزن و قەرەبالغا کامیرە و مرۆڤان دا، مە حەسەن عارف, بەرپرسێ راگەھاندنا فیلمە ڤیستیڤاڵا دھۆک یا نیڤدەولەتی دیت و ب گەرمی پێشوازی ل مالپەرێ فەرمی یێ پارتی دیموکراتی کوردستان کر، مە ژی ب دەلیڤە دیت ژێ بزانین کو حکومەتا ھەرێما کوردستانێ چەند ھاریکار و پشتەڤانە ژبۆ ساخکرنا ڤان جورە ھەلکەفتان ئەویژی گوت: "ساڵانە رێڤەبەرییا گشتی یا رەوشەنبیری و ھونەری ل پارێزگەھا دھۆکێ فیلمە فیستیڤاڵا دھۆک ب رێڤەدبەت و پارێزگارێ دھۆکێ پشتەڤانییەکا مەزن ل مە دکەت و حکومەتا ھەرێما کوردستانێ ژی مەزنترین پشتەڤانێ مەیە و رێکێ خۆش دکەت ژبۆ ئەنجامدانا ڤان چاڵاکییان دبەرژوەندییا سینەما و ھونەرێ کوردی". حەسەن عارفی گوت. بەرنامێ ڤیستیڤالێ ل ٩ی سپێدێ رۆژانە دێ دەسپێ دکەت و جاران ھەتا دەمژمێر ٨ بۆ ٩ی شەڤێ ژی دێ بەردەوام بیت.

حەسەن دووپات دکەت، کو ل پال پێشاندانا فلمان پەنەلێن جودا جودا ل سەر مژارێن ھونەری و سینەمایی دێ ھێنە پێشکێشکرن و گەشتێن زانستی ژی دێ بۆ سینەماکار و مێھڤانێن بیانی یێن ڤەستیڤاڵێ بۆ جھێن شینواری و دیروکی و گەشتیاری ل پارێزگەھا دھۆکێ دێ ھەبن.

پشتی مە پسیارا خالێن بھێزێن سەرکەفتنا فیلمە ڤیستیڤاڵا دھۆک کری"حەسەن فەتاح" بەرسڤێ ددەت و دبێژیت: "ژگەرا ١ێ و ھەتا ١١ێ بەردەوامییا ڤەستیڤاڵێ سەرکەفتنا ڤەستیڤاڵێ بوومە دووپات دکەت و ل پاڵ ڤێ چەندێ گونجاندنا خەلکێ دگەل ڤەستیڤاڵێ و ھونەری ژی گەلەک باشترە و دبینین چ ژلایێ ھونەری و تەکنیکی یان رێکخستن و ب رێڤەبرنێ یان دیکور و سینوگرافی ساڵ بۆ ساڵێ ڤ‌ستیڤاڵ پتر جھێ خۆ دکەت و پتر وەرارێ دکەت و فیلمێن پشکدار رۆژانە دێ ل ھولێن سینەماماکس و ئیدارا سەربەخۆ یا زاخۆ ھێنە نیشاندان و ب دلخۆشیڤە ھولێن نیشاندانێ بۆ ھەمی خەلکێ پارێزگەھا دھۆکێ و ژدەرڤەی پارێزگەھا دھۆکێ ڤەکرینە و ھەر خێزانەک و کەسەک دشێت سەرەدانێ بکەت و پلێتێ ب بەرامبەر کوژمەکێ کێم یێ پارەی ب دەسخۆڤە بینیت، حەسەن فەتاحی راست دگوت، پشتی من سەرەدانا ھولێن سینەمایێ کرین و دگەل دەھان کەسان ئاخفتین, تێگەھشتم, کو ئەڤا نوکە ل پێشییا خۆ دبینین نە ب تنێ فیستیڤاڵەکا ئاسایی یە، ئەڤە شورەشەکا کلتوریە دێ دھۆکێ بەرەف جیھانەکا دی یا ھونەری و پێشکەفتنێ بەت".

سەجا شێرزاد