سیستەمێ دانا پارەی ل رێڤەبەریا پاسپۆرتێن پارێزگەها دهۆک هاتە گهۆرین
ئەڤرۆ روژا پێنج شەمبێ رێکەفتی 12ی هەیڤا 10 ساڵا 2023ێ ل رێڤەبەریا پاسپۆرتێن پارێزگەها دهوکێ و هەردوو نڤێسینگەهێن پاسپۆرتێن ئیدارا سەربه‌خۆ یا زاخۆ و قەزا ئاکرێ، سیستەمێ کەڤن یێ دانا پارەیی دێ هێتە گهورین بۆ شێوازێ بانکێ، ب شێوازەکێ کو هەر هاووڵاتییەک لدەمێ بڕێڤەبرنا مامەلێن پاسپۆرتێن ژ جورێ (A) دڤێت (ماستەر کارد، یان ڤیزە کارد) دگەل دا هەبیت.
ئەڤ سیستەمێ دانا پارەیی ب شێوازێ بانکێ بەرییا نوکە ل هەردوو پارێزگەهێن دی یێن هەرێما کوردستانێ (هەولێر، سلێمانی) هاتییە برێڤەبرن و دنوکە دا ل پارێزگەها دهۆکێ ژی ئەڤ سیستەم کار پێ هاتە کرن.
رێڤەبەرێ راگەهاندنا رێڤەبەرییا گشتی یا پاسپۆرتان ل پارێزگەها دهۆکێ سەعەد گربدەوی، بۆ مالپەرێ فەرمی یێ پارتی دیموکراتی کوردستان دووپات دکەت کو مەرج نینە ئەو کارتا بانکی یا لگه‌ل هاولاتی ل سەر ناڤێ وی بیت لێ بتنێ مەرج ئەوە کارت کارابیت و پارە ل بەر هەبن ژبۆ ب رێڤەبرنا مامەلێ.
ل گۆڕه‌ی راگەهاندنا رێڤەبەرییا گشتی یا پاسپۆرتێن پارێزگەها دهۆک، رۆژانە ل سەر ئاستێ قەزا دهۆکێ نێزیک 400 مامەڵێن پاسپۆرتان دهێنە برێڤەبرن، و ل سەر ئاستێ قەزا ئاکرێ و ئیدارا سەربەخۆ یا زاخۆ رۆژانە نێزیک 250 مامەلان دهێنە برێڤەبرن ئانکو ل سەر ئاستێ پارێزگەها دهۆکێ ب گشتی ژ٦٠٠ هەتا ٧٠٠ مامەلێن پاسپۆرتان رۆژانە دهێنە برێڤەبرن.
سەجا شێرزاد-دهۆک
