دەست ب دروستکرنا بەنداڤا (گەلێ بەنداوا) ل سێمێلێ هاتەکرن

دهۆک-KDP.info- رێڤەبەرێ بەنداڤا دهۆکێ دیار کر کو کارکرن د دروستکرنا بەنداڤا (گەلێ بەنداوا) دا ل قەزا سێمێلێ یا سەر ب پارێزگەها دهۆکێ ڤە دەستپێکر کو ئەڤێ بەنداڤێ شیانێن عمبارکرنا نێزیك شەش ملیۆن مەترێن سێجا یێن ئاڤێ هەنە.

ئەندازیار فەرهاد محەمەد تاهر، رێڤەبەرێ بەنداڤا دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو پشتی ل سالا 2015 کارکرن د بەنداڤا (گەلێ بەنداوا) دا هاتیە ڕاوەستاندن، نوکە ل دووڤ فەرمانا (مەسرور بارزانی) سەرۆکێ حكومەتا هەرێما کوردستانێ و وەزارەتا چاندنێ و ژێدەرێن ئاڤێ و ب پشتەڤانیا پارێزگەها دهۆكێ و رێڤەبەریا گشتی یا بەنداڤا ب گوژمێ نێزیکی حەفت ملیار دیناران ل سەر بۆدجا حکومەتا هەرێما کوردستانێ دەست ب تمامکرنا ڤێ بەنداڤێ هاتەکرن کو بەری نوکە ب رێژا 37%کار د بجهئینانا ڤی پرۆژەی دا هاتبوو ئەنجامدان و گۆت: "ئەڤە بەنداڤا سێیێ یا بچووکە ل سنوورێ پارێزگەها دهۆكێ دەست ب کارێ تمامکرنا وێ دهێتەکرن پشتی کو بەنداڤا خنس ل قەزا شێخان ب دووماهی هاتی".

رێڤەبەرێ بەنداڤا دهۆکێ ئاماژە دا وێ چەندێ کو ل رۆژێن بوری وان کۆمبوونەکا بەرفرەهـ دگەل فەرمانگەها ئەندازیاری یا سەرپەرشتا پرۆژەی و كۆمپانیا جێبەجێكار ئەنجامدایە ب مەرەما باشتر برێڤەبرنا کاری، د هەمان دەم دا داخواز ژ کۆمپانیا جێبەجێکار هاتیەکرن کو ئامادەکاریێن باشتر بکەن ژ بەر کو کاودانێن کارکرنێ د گۆنجای نە و هەکە د شیان دابیت دوو شێفتا کاری ل سەر ڤی پرۆژەی ئەنجام بدەن، ئەڤە ددەمەکی دایە کو کارێ ڤی پرۆژەی ژ لایێ دوو کۆمپانیان ڤە و فەرمانگەها ئەندازیاریا پرۆژەی و ئەندازیار و سەرپەرشتیار رێڤەبەریا بەنداڤا دهۆكێ ڤە دهێتە ئەنجامدان.

 

رێوار محەمەد رەشید