سه‌رۆكى هه‌رێمى كوردستان پیرۆزبایى له یه‌كێتیى نیشتمانیى كوردستان ده‌كات
به‌ڕێز نێچیرڤان بارزانى، سه‌رۆكى هه‌رێمى كوردستان، له په‌یوه‌ندییه‌كى ته‌له‌فۆنیدا له‌گه‌ڵ به‌ڕێز بافڵ تاڵه‌بانى، سه‌رۆكى یه‌كێتیى نیشتمانیى كوردستان، بۆ یادى (48) ساڵه‌ى دامه‌زراندنى یه‌كێتى، پیرۆزبایى له به‌ڕێزیان و ئه‌نجومه‌نى باڵاى سیاسى و به‌رژه‌وه‌ندییه‌كان و مه‌كته‌بى سیاسى و سه‌ركردایه‌تى و ته‌واوى ئه‌ندامان و جه‌ماوه‌رى یه‌كێتیى نیشتمانیى كوردستان كرد و هیواى سه‌ركه‌وتنى بۆ خواستن.
سه‌رۆك نێچیرڤان بارزانى هه‌ر به‌م بۆنه‌یه‌وه وێڕاى ئاماژه‌دان به خه‌بات و مێژووى یه‌كێتیى، خوالێخۆشبوو سه‌رۆك مام جه‌لال و پێگه و ڕۆڵى به بیر هێنایه‌وه و هیواى خواست ئه‌م یاده ببێته هانده‌رى ته‌بایى و پێكه‌وه‌یى و یه‌كڕیزیى لایه‌نه سیاسییه‌كان، به‌تایبه‌تى پارتى و یه‌كێتى.
لاى خۆیه‌وه به‌ڕێز سه‌رۆكى یه‌كێتیى نیشتمانیى كوردستان، به ناوى خۆى و سه‌ركردایه‌تیى یه‌كێتییه‌وه، سوپاس و پێزانینى بۆ پیرۆزبایى و په‌یوه‌ندیى به‌ڕێز سه‌رۆكى هه‌رێمى كوردستان ده‌ربرى و هیواى سه‌ركه‌وتنى بۆ خواست.
