شاندێکی هەرێمی کوردستان لەم هەفتەیە سەردانی وڵاتی ئێران دەکات

هەولێر-KDP.info-  بەڕێوەبەری گشتیی پەیوەندییەکانی نێوان هەرێمی کوردستان و ئێران ئاشکرای کرد، بڕیارە لەم هەفتەیە شاندێکی هەرێمی کوردستان سەردانی وڵاتی ئێران بکات بۆ گفتوگۆکردن لەبارەی زیادکردنی قەبارەی بازرگانیی نێوان هەرێمی کوردستان و ئێران.

بەڕێوەبەری گشتیی پەیوەندییەکانی نێوان هەرێمی کوردستان و ئێران، عەبدوڵا ئاکرەیی، بۆ ماڵپەڕی فەرمیی پارتی دیموکراتی کوردستان گوتی: بڕیارە ئەم هەفتەیە ڕۆژی چوارشەممە شاندێکی هەرێمی کوردستان کە پێک هاتووە لە پارێزگاری هەرچوار پارێزگای هەرێم و سەرپەرشتیاری هەرچوار ئیدارەی سەربەخۆی هەرێم و سەرۆکی ژووری بازرگانیی پارێزگاکانی هەرێم و بەڕێوەبەری خاڵە سنوورییەکانی باشماخ و پەروێزخان و حاجی ئۆمەران سەردانی ئێران بکەن، لەم سەردانەدا شاندی هەرێم لەگەڵ پارێزگاکانی کرماشان و سنە و ئورمیە و تەبرێز کۆ دەبنەوە.

عەبدوڵا ئاکرەیی گوتیشی: مەبەست لەو سەردانەش ئاڵوگۆڕی بازرگانی و پەیوەندیی هەردوولا و سنوورەکان، بۆ ئەوەی هەموو ئاسانکاری بکرێت بۆ زیادکردنی قەبارەی بازرگانی لە نێوان هەرێمی کوردستان و ئێران کە ئێستا قەبارەی بازرگانی لە نێوان هەردوولا دەگاتە نزیکەی چوار ملیار دۆلاری ساڵانە.

 

بڵند ئیبراهیم