90% پرۆژێ نووژەنکرنا بازاڕێ کەڤنارێ زاخۆ ب دووماهی هاتیە
زاخۆ -KDP.info- بەرپرسێ ڕاگەهاندنێ ل رێڤەبەریا گشتی یا گەشتوگۆزارا ئیدارا سەربەخۆ یا زاخۆ دیار کر کو کارکرن د پرۆژێ نووژەنکرنا بازاڕێ کەڤنارێ زاخۆ دا یا بەردەوامە و هەتا نوکە 90٪ کار د ڤی پرۆژەی دا هاتیە ئەنجامدان و ژ بلی وێ چەندێ کو ئەڤ بازاڕە دێ سیمایەکێ جوان دەتە باژێڕی د پلان دایە بۆ مەرەمێن گەشیاری ژی بهێتە بکارئینان.
بێوار سندی، بەرپرسێ ڕاگەهاندنێ ل رێڤەبەریا گشتی یا گەشتوگۆزارا ئیدارا سەربەخۆ یا زاخۆ بۆ ماڵپەرێ فەرمیێ پارتی دیموکراتی کوردستان ئاشکرا کر کو پشتی زاخۆ ل سەر دەمێ کابینا نەهێ یا حکومەتا هەرێما کوردستانێ وەکو ئیدارەکا سەربەخۆ هاتیە ڕاگەهاندن و ئاڤەدانیەکا زێدەتر ژ هەمی ئالیەکی ڤە بخوەڤە دیتی و ژمارەکا مەزن یا پرۆژێن گەشتیاری ژی وەکو هەمی پرۆژێن دی یێن خزمەتگۆزاری ل ئیدارا ناڤهاتی هاتینە ئەنجامدان، ل هەیاما بوری ب پشتەڤانیا حکومەتا هەرێما کوردستانێ دەست بجهئینانا پرۆژێ نووژەنکرنا بازاڕێ کەڤنارێ زاخۆ یێ ناڤدار ب بازاڕێ تاری هاتبووکرن کو 120 دوکانان د ناڤ ڤی بازاڕی دا هەنە و نوکە کارکرن د نووژەنکرنا ڤی بازاڕی دا د قووناغێن دووماهیێ دایە و ب رێژا 90% کار هاتیە ئەنجامدان، ئەڤ بازاڕە ل سەر شێوەیێ وی یێ بەرێ یێ دهێتە نووژەنکرن و ل دەمەکێ نێزیک دێ ب دووماهی هێت و کەڤیتە د خزمەتا وەلاتی و گەشتیاران دا.
ناڤهاتی ئاماژە دا وێ چەندێ کو د پلانا رێڤەبەریا گشتی یا گەشتوگۆزارا زاخۆ دایە کو رەنگڤەدانا گەشتوگۆزارەکا تام کوردەواری کو دەربڕینێ ژ کەلتۆر و دابونەریتێن مە یێن کوردەواری ب تایبەتی یێن دەڤەرا زاخۆ بکەت دناڤ ڤی بازاڕی دا هەبیت بۆ ڤێ مەرەمێ ژی دوکانێن د ناڤ ڤی بازاڕی دا ل سەر چەند زۆنێن جوراوجور هاتینە بەلاڤکرن بۆ وێ چەندێ جوداهیەک ل گەل بازاڕێن دی یێن زاخۆ هەبیت ژوان ژی چەندین جهێن فرۆتنا کەلوپەل و کەرەستە و خوارنگەهێن خوارنێن کوردەواری دێ د ناڤ ڤی بازاڕی دا هەبن، هەروەسا د ناڤ ڤی بازاڕی دا دێ گرنگیەکا تایبەت دەنە کارێن دەستی زێدەباری ڤێ چەندێ دێ چەندین کافێ و جهێن بهێنڤەدانێ ژی د ناڤ هەمان بازاڕ دا هەبن.
بەرپرسێ ڕاگەهاندنێ ل رێڤەبەریا گشتی یا گەشتوگۆزارا ئیدارا سەربەخۆ یا زاخۆ خویا کر کو ئەو دێ هەمی بزاڤان کەن بازارگێڕیا گەشتیاری ل سنوورێ ئیدارا سەربەخۆ یا زاخۆ خۆرتر لێ بکەن و بەرێ گەشتیارێن سەرەدانا زاخۆ دکەن بدەنە ڤی بازاڕی بۆ وێ چەندێ وەکو جهەکێ گەشتیاری ژی مفا ژ ڤی بازاڕی بهێتە وەرگرتن، سەرەرایی ڤێ چەندێ د پلانا وان دایە د ئەڤ سالە دا رێژا هاتنا گەشتیاران بۆ سنوورێ ئیدارا ناڤهاتی ژ سالێن بوری زێدەتر لێ بکەن.
رێوار محەمەد رەشید
