ده‌ست ب چێكرنا جووت سایدێ چه‌مانكێ هاته‌كرن

دهۆك –KDP.info- رێڤه‌به‌رێ ناحیا چه‌مانكێ دیار كر كو ده‌ست ب چێكرنا پرۆژێ جووت سایدێ ناحیا چه‌مانكێ یا سه‌ر ب قه‌زا ئامێدیێ ڤه‌ هاته‌كرن و د چارچۆڤێ ڤى پرۆژه‌یى دا دێ چه‌ندین باخچه‌ و دوكان و جهێن بهێنڤه‌دانانێ ل سه‌ر ڤى جووت سایدى هێنه‌ چێكرن.

ئیسماعیل حه‌مید، رێڤه‌به‌رێ ناحیا چه‌مانكێ بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو كاروانێ ئاڤه‌دانیێ ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ ل ناحیا چه‌مانكێ یا سه‌ر ب قه‌زا ئامێدیێ ژى ڤه‌ وه‌كو هه‌موو ده‌ڤه‌رێن دى یێن هه‌رێما كوردستانێ یێ به‌رده‌وامه‌ و نوكه‌ ب گوژمێ پترى دوو ملیار دیناران ل سه‌ر بۆدجا حكومه‌تا هه‌رێما كوردستانێ رێڤه‌به‌ریا گشتى یا باژێرڤانیان ل پارێزگه‌ها دهۆكێ ده‌ست ب چێكرنا جووت سایدێ سه‌ره‌كى یێ سه‌نته‌رێ ناحیا چه‌مانكێ كریه‌ و ژڤانه‌ ئه‌ڤ پرۆژه‌ د ده‌مێ ساله‌كێ دا ب دووماهى بهێت، به‌لێ به‌لێنده‌رێ پرۆژه‌ى سۆز دایه‌ ڤى پرۆژه‌ى ل به‌ر ده‌مێ بۆ ب دووماهى هاتنا پرۆژه‌ى هاتیه‌ ده‌ستنیشانكرن ب دووماهى بینیت.
رێڤه‌به‌رێ ناحیا چه‌مانكێ ئاماژه‌ دا وێ چه‌ندێ كو هه‌ر د چارچۆڤێ ڤى پرۆژه‌ى دا كو نوكه‌ پرۆژه‌ د قووناغا ده‌ستپێكێ دایه‌ چه‌ندین جهێن ڤى جووت سایدى بۆ دروستكرنا باخچه‌ و دوكانان و جهێن خزمه‌تگۆزارى هاتینه‌ ته‌رخانكرن، ئه‌ڤه‌ دده‌مه‌كى دایه‌ دیزاینا ڤى پرۆژه‌ى ب شێوه‌یه‌كێ شارستانى و سه‌رده‌مانه‌ هاتیه‌ دروستكرن و ب دووماهى هاتنا ڤى پرۆژه‌ى دێ هاتنوچوونا وه‌لاتى و رێڤینگ و گه‌شتیاران ب سه‌ناهیتر لێ هێت.

رێوار محه‌مه‌د ره‌شید