كۆنفرانسێ ئێكێ یێ زانستى یێ سه‌ندیكا نۆشداران ل دهۆكێ ده‌ست پێ كر
دهۆك-KDP.info- ل ژێر دروشمێ (به‌ره‌ف كاركرنه‌كا پزیشكى یا پیشه‌یى و ب سلامه‌ت) سه‌ندیكا نۆشدارێن كوردستانێ تایێ دهۆك ب هه‌ڤكارى دگه‌ل كۆلیژێن پزیشكى ل زانكۆیا دهۆك و زاخۆ و رێڤه‌به‌ریا گشتى یا ساخله‌میێ ل پارێزگه‌ها دهۆكێ ئه‌ڤرۆ رۆژا پێنجشه‌مبى 11/5/2023 ب ئاماده‌بوونا د.سامان به‌رزنجى وه‌زیرێ ساخله‌میێ ل هه‌رێما كوردستانێ و پ.د.عه‌لى ته‌ته‌ر، پارێزگارێ دهۆكێ و شاندێن سه‌ندیكایێن نۆشداران ل عیراقێ ب پشكداریا پترى هزار نۆشداران سه‌ندیكا ناڤهاتى ده‌ست ب ئه‌نجامدانا كۆنفرانسێ خوه یێ ئێكێ ل هۆلا كۆنگران ل زانكۆیا دهۆك كر.
د.سامان به‌رزنجى، وه‌زیرێ ساخله‌میێ ل هه‌رێما كوردستانێ ئاشكرا كر كو جهێ خوه‌شحالیێ یه كۆنفرانسێن ب ڤى شێوه‌یى د ئاسته‌كێ نێڤده‌وله‌تى یێ وه‌لاتێن پێشكه‌فتى دا ل هه‌رێما كوردستانێ دهێنه ئه‌نجامدان كو نۆشدارێن مه ڤه‌كۆلینێن خوه و راپۆرتێن نۆشدارى ده‌م بۆ ده‌مى ب رێیا ڤان كۆنفرانسان نیشادده‌ن، ئه‌ڤه دده‌مه‌كى دایه كو جیهانا نۆشدارى زوو پێش دكه‌ڤیت و وه‌كو وه‌زاره‌تا ساخله‌میێ ل حكومه‌تا هه‌رێما كوردستانێ ژى ئه‌م به‌رده‌وام پشته‌ڤانیێ ل بهێزكرنا شیانان دكه‌ین بۆ وێ چه‌ندێ مه ژێرخانه‌كا بهێز یا ساخله‌میێ هه‌بیت و خزمه‌تگۆزاریێن ساخله‌میێ به‌ره‌ف پێش ڤه ببه‌ین.
د.عه‌لى ته‌ته‌ر پارێزگارێ دهۆكێ دیار كر كو ساخله‌مى چو یا تاك بیت یان یا جڤاكى بیت ئێك ژ كارێن ده‌ستپێكى یێن هه‌ر حكومه‌ته‌كێ و كارگێریه‌كێ و كۆمه‌لگه‌هه‌كێ یه د ڤى چارچۆڤه‌ى دا ژى جه‌نابێ سه‌رۆكێ حكومه‌تا هه‌رێما كوردستانێ و كابینا نه‌هێ سه‌ره‌رایى ده‌ستبكاربوونا وێ دگه‌ل په‌یدابوونا نه‌خۆشیه‌كا جیهانى ره‌نگه ئه‌م نه‌شیابین وه‌كو پێدڤى خزمه‌تا وه‌لاتیێن خوه بكه‌ین، به‌لێ بێگۆمان د چارچۆڤێ ڤێ نه‌خۆشیا كۆڤید – 19 دا ئه‌ز ل ڤێرێ ب ده‌لیڤه دبینم سۆپاسیا هه‌مى نۆشدارێن هه‌رێما كوردستانێ دكه‌م كو ب شێوه‌یكێ گه‌له‌ك باش و ل دووڤ ستاندارتێن جیهانى سه‌ره‌ده‌رى دگه‌ل ڤێ نه‌خۆشیێ كر و هه‌مى بزاڤ كرن كو گیانێ وه‌لاتیان ژ ڤێ نه‌خۆشیێ بپارێزن بۆ وێ چه‌ندێ كێمترین رێژا قوربانیان بده‌ین.
پارێزگارێ دهۆكێ گۆت: "گه‌له‌ك یا گرنگه د سیسته‌مێ مه یێ په‌روه‌ردێ دا هه‌ر ژ باخچێ زارۆیان هه‌تا قووناغێن خواندنێ ب دووماهى دهێن به‌حس ل بابه‌تێن ساخله‌میێ و رێیێن خوه‌پاراستنێ بهێنه‌كرن"
.
رێوار محه‌مه‌د ره‌شید
