ده‌سته‌ خویشكاتى دناڤبه‌را دهۆكێ و باژێڕێ ره‌یدن یێ هۆله‌ندى دا هاته‌ ئیمزاكرن

دهۆك –KDP.info- د رێوره‌سمه‌كى دا ئه‌ڤرۆ رۆژا سێشه‌مبى 9/5/2023 ده‌سته‌ خوشكایه‌تى دناڤبه‌را باژێڕێ دهۆكێ و باژێڕێ ره‌یدن یێ وه‌لاتێ هۆله‌ندا دا هاته‌ ئیمزاكرن.

د.عه‌لى ته‌ته‌، پارێزگارێ دهۆكێ د كۆنگره‌كێ رۆژنامه‌ڤانى دا دیار كر كو ئه‌ڤرۆ ده‌سته‌ خوشكایه‌تى دناڤبه‌را دهۆكێ و باژێڕێ ره‌یدن یێ وه‌لاتێ هۆله‌ندا دا هاته‌ ئیمزاكرن، بۆ ده‌مه‌كێ درێژه‌ پارێزگه‌ها دهۆكێ په‌یوه‌ندیێن باش ل گه‌ل باژێرێ ناڤهاتى هه‌نه‌ خوه‌شبه‌ختانه‌ ئه‌ڤ په‌یوه‌ندیه‌ ئه‌ڤرۆ دناڤبه‌را هه‌ر دوو باژێڕان دا ب شێوه‌یه‌كێ باشتر و به‌رفره‌هتر هاته‌ ئیمزاكرن كو د چارچۆڤێ ڤێ ده‌سته‌ خوشكاتیێ دا دێ په‌یوه‌ندیێن به‌رفره‌هتر د هه‌موو بواران دا هێنه‌ دروستكرن ب تایبه‌تى د بوارێ مه‌زاختنا ئاڤێ و چاره‌سه‌ركرنا هاڤێتنا به‌رمایكان و باخچه‌داریێ و گه‌شتیارى و سیاسى و كه‌لتۆرى هتد..... وه‌كو وان هه‌مى باژێڕێن دى یێن كو مه‌ ده‌سته‌ خوشكاتى ل گه‌ل هه‌ى.

 

 

پارێزگارێ دهۆكێ ئاماژه‌ دا وێ چه‌ندێ كو نوكه‌ ژى ب هاریكاریا وه‌لاتێ هۆله‌ندا كاره‌كێ مه‌زن ل سه‌ر ئاستێ عیراقێ و هه‌رێما كوردستانێ د بوارێ چاندنێ دا ل قه‌زا به‌رده‌ره‌ش یا سه‌ر ب پارێزگه‌ها دهۆكێ ڤه‌ یێ دهێته‌كرن، ئه‌ڤه‌ دده‌مه‌كى دایه‌ كو جه‌نابێ سه‌رۆكێ حكومه‌تا هه‌رێما كوردستانێ گرنگیه‌كا مه‌زن دده‌ته‌ پێشخستنا وه‌لاتى كا ب چو شێوه‌ وه‌لاتێ خوه‌ پێشبێخین و ئابووره‌كێ بهێز بۆ خوه‌ په‌یداكه‌ین و داهاتێن مه‌ هه‌ین ب پارێزین و به‌ر ب پێشڤه‌ببه‌ین و داهاتێ خوه‌ هه‌مه‌جۆر بكه‌ین، ئه‌ڤه‌ ژى ئێك ژوان ده‌ستكه‌فتایه‌.
رێوار محه‌مه‌د ره‌شید