گەیلانی بۆ KDP: لە ئایندەیەکی نزیکدا پارتی و یەکێتی کۆدەبنەوە
ڕانیە-KDP.info- ئەندامێکی کۆمیتەی ناوەندی پارتی گوتی، لە ئایندەیەکی نزیکدا پارتی و یەکێتی بۆ چارەسەرکردنی کێشەکان کۆدەبنەوە و دەشڵێ، پارتی پێداگیرە لەسەر ھەڵوێستی خۆی بۆ ئەنجامدانی ھەڵبژاردن لەمساڵدا و کێشەکانیش چارەسەر دەکرێن.
ھیوا گەیلانی، ئەندامی کۆمیتەی ناوەندی پارتی، بە ماڵپەڕی فەرمیی پارتی دیموکراتی کوردستانی راگەیاند: "لای پارتی کۆبوونەوە و لێک تێگەیشتن و دانوستان شتێکی نەگۆڕە، دانوستانەکانی پارتی و یەکێتی دەست پێدەکەنەوە و لە ئایندەیەکی نزیکدا ھەردوولا بۆ چارەسەرکردنی کێشەکان کۆدەبنەوە، ئێمە وەک پارتی نیەتی چارەسەرکردنی کێشەکانمان ھەیە و گەشبینین بەوە ئەو کێشانەی ئێستا ھەن ھەموویان چارەسەر دەبن".
ھیوا گەیلانی ئاماژەی بۆ ئەوەشکرد: "پارتی دیموکراتی کوردستان جدییە لەسەر بڕیاری خۆی بۆ ئەنجامدانی پڕۆسەی ھەڵبژاردن لەمساڵدا و ئێمە سەدا سەد لەگەڵ ھەڵبژاردنین لەکاتی دیاری کراوی خۆی بەڕێوەبچێت، پێشتریش پارتی لەگەڵ ئەنجامدانی ھەڵبژاردن بووە لەکاتی خۆیدا نەوه‌ك دوابخرێت".
قائید میرۆ
