ئەڤرۆ دەست ب ڤەکرن و قێرکرنا جادێن ژمارەکا تاخێن باژێڕێ دهۆکێ هاتەکرن

دهۆک-KDP.info- بەرپرسێ ڕاگەهاندنێ ل سەرۆکاتیا باژێڕڤانیا دهۆکێ دیار کر کو د بەردەوامیا بجهئینانا پرۆژێن نوی یێن خزمەتگۆزاری دا یێن کو ل سەر دەمێ کابینا نەهێ یا حکومەتا هەرێما کوردستانێ دهێنە بجهئینان ژ وان ژی پرۆژێن ڤەکرن و قێرکرنا جادان ئەڤرۆ رۆژا ئێکشەمبی 7/5/2023 دەست ب ڤەکرن و قێرکرنا جادێن ژمارەکا تاخێن باژێڕێ دهۆکێ هاتەکرن.

ئیسماعیل مستەفا، بەرپرسێ ڕاگەهاندنێ ل سەرۆکاتیا باژێڕڤانیا دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو بجهئینانا پرۆژێن خزمەتگۆزاری ل هەمی تاخێن باژێڕێ دهۆکێ بێ جوداهی ژ لایێ سەرۆکاتیا باژێڕڤانیا دهۆکێ ڤە یا بەردەوامە و ئەڤرۆ ژی دەست ب ڤەکرن و قێرکرنا ژمارەکا جادان ل سنوورێن باژێرڤانیا رۆژهەلات و رۆژئاڤا هاتەکرن و د هەمان دەم دا قووناغا دووێ یا کارێ پرۆژێ ڤەکرن و تێکەلکرن و زفتکرنا ژمارەکا جادان ل تاخێ پیشەسازیا نوی ل پشت دەڤەرا پێشانگەهێن ترۆمبێلان ب رووبەرێ 9000 مەترێن دووجا ب دووماهی هات.
ناڤهاتی ئاماژە دا وێ چەندێ کو نوکە کار د کەزاختنا داران و زێدەکرنا رێژا کەسکاتی ژی د ناڤ باژێڕێ دهۆکێ دا ژ لایێ رێڤەبەریا ئەندازەیا پارکان یا سەر ب سەرۆکاتیا باژێرڤانیا دهۆکێ ڤە یێ بەردەوامە.

رێوار محەمەد رەشید