بڕیارێن نوی بۆ خودان دوکانێن پیشەسازیا نوی یا ترۆمبێلان ل دهۆکێ هاتنە دەرکرن
دهۆک-KDP.info- رێڤەبەرێ گشتی یێ وەبەرهێنانێ ل پارێزگەها دهۆکێ ئاشکرا کر کو پشتی دوکانێن پیشەسازیا نوی یا ترۆمبێلان ل ئالۆکا ب دووماهی هاتین و ڕادەستی خودانان هاتینەکرن، هەتا نوکە هندەک ژوان خودانان دوکانێن خوە بکارنەئیناینە ژ بەر ڤێ چەندێ ژی چەند بڕیارێن نوی هاتنە دەرکرن.
کوردو ئیحسان، رێڤەبەرێ گشتی یێ وەبەرهێنانێ ل پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو پشتی رێڤەبەریا وان کۆمبوونەک ل دۆر بابەتێ ئاریشێن پرۆژێ دوکانێن پیشەسازیا نوی یا ترۆمبێلان ل ئالۆکا دگەل سەرۆکێ باژێڕڤانیا رۆژئاڤا و رۆژهەلات و رێڤه‌به‌ریا كار و سه‌رۆكێ سه‌ندیكا كرێكارێن كوردستانێ و وەبەرهێنەرێ پرۆژێ ناڤهاتی ئەنجامدای و دانوستاندن هاتیەکرن چەندین بڕیار بۆ چارەسەرکرنا ئاریشێن ڤی برۆژەی هاتنە دەرکرن ژ وان بڕیاران پێدڤیە ئەو کەسێن دوکانێن خوە وەرگرتین د دەمێ هەیڤەکێ دا جهێن خوە یێن كارى ل پیشه‌سازیا نوى ڤه‌كه‌ن، به‌روڤاژى جهێن وان دێ ژێ هێنه ڤەکێشان، هەروەسا دووڤچوون و چاڤدێری ژ لایێ باژێڕڤانیا رۆژهه‌لات و رۆژئاڤا دێ هێته‌كرن و زێده‌گاڤیێن نه‌یاسایى ل نزاركێ هاتینەكرن دێ ب رێیێن یاسایی هێته راوه‌ستاندن د هەمان دەم دا مۆلەت بۆ چ جهێن دیتر یێن كارێ پیشه‌سازیێ دكه‌ن د ناڤ باژێڕى دا ناهێتەدان.
ناڤهاتی ئاماژە دا وێ چەندێ کو هەر د چارچۆڤێ وان بڕیارێن نوی دا یێن کو بۆ خودانێن دوکانێن پیشەسازیا نوی یا ترۆمبێلان هاتینە دەرکرن رێڤه‌به‌ریا كارى مۆله‌تا كاركرنێ ناده‌ته چو كه‌سان ژ ئەوان هاولاتیان و دیسان مۆلەتێ بۆ نوى ناكه‌ت ئه‌گه‌ر ل جهێ بۆ هاتیه‌دان ل پیشه‌سازیا ئالۆكا نه‌بیت، هەروەسا سه‌ندیكا كرێكارێن كوردستانێ و لیژنا نوونەراتیا خودان پیشه‌یان هاریکاربن ژ بۆ ئاگه‌هداركرنا ئەڤان پیشه‌كاران بۆ ڤه‌كرنا جهێن بۆ هاتینەدان ل پیشه‌سازیا نوی یا ئالۆكا، هەروەسا ئه‌و خودان پیشه‌یێن قستێن خوە نه‌داین و جهێن خوە وەرنەگرتین بریار هاتییه‌دان كو جهێن وان بۆ بهێنه دابینكرن ب هه‌مان بهایێ به‌رێ ب مه‌رجه‌كى قستێن خوە هه‌میان ل سه‌ر ئێك بده‌ن و ئاماده‌بن کو جهێن خوە ڤه‌كه‌ن.
رێوار محەمەد رەشید
