سه‌رۆك بارزانی: گەلی کورد دەرفەتی تۆڵەکردنەوەی هەبوو بەڵام لێبووردن و ئاشتەوایی هەڵبژارد
هەولێر-KDP.info- کۆنفرانسی زانستی نێودەوڵەتی بە جینۆساید ناساندنی کوردانی فەیلی ده‌ستی پێكرد.
ئه‌مڕۆ سێشه‌ممه، بە ئامادەبوونی سەرۆک بارزانی و سه‌رۆكی هه‌رێم و سه‌رۆك وه‌زیرانی هه‌رێمی كوردستان و ژمارەیەک لە بەرپرسانی حکوومەتی هەرێمی کوردستان و عێراق، مامۆستایانی زانکۆ و پەیمانگەکان و ژماریەکی زۆری مێژوونووس و چالاکوان لەسه‌ر ئاستی ناوخۆ و دەرەوەی هەرێمی کوردستان و عێراق و ده‌ره‌وه به‌شدارن له كۆنفرانسی زانستی نێودەوڵەتی بە جینۆساید ناساندنی کوردانی فەیلی لە شاری هەولێر.
له كۆنفراسه‌كه‌دا سه‌رۆك مه‌سعود بارزانی گوتارێكی پێش كه‌ش كرد و رایگه‌یاند: كوردانی فه‌یلی به‌شێكی سه‌ره‌كی گه‌له‌كه‌مانن، كوردانی فه‌یلی ناسنامه‌ی خۆیان پاراستووه، كوردانی فه‌یلی دووچاری كاره‌ساتی گه‌وره بوونه‌وه، كوردانی فه‌یلی دووچاری ره‌فتاری وه‌حشیگه‌رانه بوونه‌وه.
هه‌روه‌ها سه‌رۆك بارزانی راشیگه‌یاند: گەلی کورد دەرفەتی تۆڵەکردنەوەی هەبوو، بەڵام لێبووردن و ئاشتەوایی هەڵبژارد.
گوتیشی، پێویسته كوردانی فه‌یلی قه‌ره‌بوو بكرێنه‌وه، گه‌لی كوردستان تاوانه‌كانی ڕژێمی به‌عس له بیر ناكات، كوردانی فه‌یلی ڕۆڵی سه‌ره‌كیان له دامه‌زراندنی پارتیدا هه‌بووه.
سه‌رۆك بارزانی گوتیشی، گومانی تێدا نییە 12 هەزار کوردی فەیلی شەهیدکراون و پێشنیازی دروستکردنی سەنتەرێکی تایبەت بۆ بەدواداچوون بۆ دۆسیەی کوردانی فەیلی لە هەولێر دەکەم.
کۆنفرانسی زانستی نێودەوڵەتی بە جینۆساید ناساندنی کوردانی فەیلی بۆ قسەکردن ده‌بێت لەسەر جینۆسایدکردنی کوردانی فەیلی، کە لە چەند قۆناغێکی جیاوازدا لەسەرەتای ساڵی 1980 تا کۆتاییەکانی ساڵی 1990 بەردەوام بوو.
جینۆسایدی کوردانی فەیلیی، ئەو تاوانەیە کە لە سەدەی رابردوودا رژێمی سەدام حوسێن بەرامبەر بە کوردانی فەیلی ئەنجامیدا لەوانەش کوشتنی خەڵکی بێتاوان و ئاوارەکردنی زۆرەملێی فەیلییەکان و وەرگرتنەوەی رەگەزنامە لێیان و چەندین تاوانی دیکە. دادگای باڵای تاوانەکانی عێراق بە فەرمی توندوتیژییەکان دژ بە فەیلییەکانی بە "جینۆساید" ناو هێناوە.
کۆنفرانسەکە بە هاوبەشی لەنێوان زانکۆکانی دهۆک، هەولێر و سۆران بەڕێوەدەبرێت و لە ژێر سەرپەرشیی راستەوخۆی بارەگای بارزانی بۆ ماوەی سێ رۆژ بەردەوام دەبێت.
تا ئێستا زیاتر لە 22 هەزار کوردی فەیلی بێسەروشوێنن و لە سەرەتای ساڵی 1980 تا 1990، 14 شوێنی کوردانی فەیلی بە تەواوەتی خاپوورکراون و بەشێکی زۆریان بە ناچاری رەوانەی سنوورەکان ئێران کران.
