شاندەکێ فەرمیێ هەرێما کوردستانێ گەهشتە ئەمریکا
دهۆک-KDP.info- سکرتێرێ رۆژنامەڤانی یێ پارێزگارێ دهۆکێ دیار کر کو ب مەرەما بجهئینانا رێکەفتناما دەستە خۆیشکا دهۆک و دیترویت شاندەکێ فەرمیێ هەرێما کوردستانێ گەهشتە ویلایەتێن ئێکگرتی یێن ئەمریکا و ژ لایێ (بەیان سامی عەبدولرەحمان) نوونەرا حکومەتا هەرێما کوردستانێ هاتنە پێشوازیکرن.
مللەت عسمەت، سکرتێرێ رۆژنامەڤانی یێ پارێزگارێ دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو شاندێ فەرمیێ هەرێما کوردستانێ پێک دهێت (د.عەلی تەتەر) پارێزگارێ دهۆکێ و (د.محەمەد شکری) سەرۆکێ دەستەیا وەبەرهێنانێ ل هەرێما کوردستانێ و (روبینا عەزیز) ئەنداما پەرلەمانێ کوردستانێ و (ئەیاد عەبدولحەلیم) سەرۆکێ ژوورا بازرگانی و پیشەسازی یا دهۆکێ، ئەڤ شاندە نوکە ل ویلایەتا مشیگانن و دێ کۆمبوونەکێ دگەل بەرپرسێن حکومی و ژوورا بازرگانیا کلدانیا ئەمریکی و سازیا رەڤەندا کلدانیان و کەسایەتیێن دی یێن جڤاکێ کلدانیان کو دوستێن هەرێما کوردستانێ نە ئەنجامدان، هەروەسا سەرەرایی ئەنجامدانا چەندین دیدار و کۆمبوونان کار دێ بۆ بجهئینانا رێکەفتناما دەستە خۆیشکا دهۆک و دیترویت هێتەکرن.
ناڤهاتی ئاماژە دا وێ چەندێ کو هەر د چارچۆڤێ ڤێ سەرەدانێ دا هەر وەکو د.عەلی تەتەر، پارێزگارێ دهۆکێ ڕاگەهاندی هەمی بزاڤ دێ هێنەکرن کو پەیوەندی دگەل وەبەرهێنەرێن ویلایەتێن ئێکگرتی یێن ئەمریکا بتایبەتی یێن ویلایەتا مشیگان بۆ وێ چەندێ بهێن پرۆژێن وەبەرهێنانێ ل هەرێما کوردستانێ ئەنجامبدەن، ئەڤە ددەمەکی دایە کو وان ئامادەیا خوە بۆ دانانا هندەک کارگەهێن باش ل هەرێما کوردستانێ دیارکریە و چەندین کارێن دی یێن هەڤپشک دێ هێنە ئەنجامدان و گۆت: "بۆ هەمان مەرەم ل سالا بوری ژی پارێزگارێ دهۆکێ دگەل شاندەکێ هەرێما کوردستانێ سەرەدانا ویلایەتێن ناڤهاتی کربوو".
رێوار محەمەد رەشید
