281 هزار پلێتێن ئاهێن خوارنێ یێن ئه‌لكترۆنى گه‌هشتینه‌ دهۆكێ

دهۆك –KDP.info-  رێڤه‌به‌رێ رێكخستنا پلێتێن ئاهێن خوارنێ ل پارێزگه‌ها دهۆكێ دیار كر كو پشتى بڕیار هاتیه‌دان پلێتێن ئاهێن خوارنێ ل سه‌رانسه‌رى عیراقا فیدڕال ببنه‌ ئه‌لكترۆنى، نوكه‌ ل پارێزگه‌ها دهۆكێ ئه‌ڤ پلێته‌ كارا بوویه‌ و 281 هزار پلێتێن ئاهێن خوارنێ ژ لایێ به‌غدا ڤه‌ بۆ هه‌مان پارێزگه‌ها هاتینه‌ هنارتن.

حسێن سه‌برى، رێڤه‌به‌رێ رێكخستنا پلێتێن ئاهێن خوارنێ ل پارێزگه‌ها دهۆكێ بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو ئه‌ڤرۆ رۆژا سێشه‌مبى 25/4/2023 ده‌ست ب به‌لاڤكرنا پلێتێن ئاهێن خوارنێ یێن ئه‌لكترۆنى ل دهۆكێ هاته‌كرن و هه‌تا ده‌مژمێر 5:00 ئێڤارى 9675 پلێت هاتنه‌ به‌لاڤكرن ئه‌ڤه‌ دده‌مه‌كى دایه‌ كو 281 هزار پلێتێن ئاهێن خوارنێ ژ لایێ به‌غدا ڤه‌ بۆ پارێزگه‌ها دهۆكێ هاتینه‌ هنارتن و گۆت: "ئه‌ڤ پلێته‌ دێ ل 44 بنگه‌هان هێنه‌ كاراكرن و د پلان دایه‌ ژمارا بنگه‌هان بهێته‌ زێده‌كرن و هه‌مى به‌رهه‌ڤى ژى ژ لایێ رێڤه‌به‌را وان ڤه‌ بۆ ڤێ مه‌ره‌مێ هاتینه‌كرن".

 

ناڤهتى ئاماژه‌ دا وێ چه‌ندێ كو هه‌ر خێزانه‌كا پلێتا خوه‌ یا ئاهێن خوارنێ یا ئه‌لكترۆنى وه‌رگریت دڤێت سه‌ره‌دانا بنگه‌هێن ده‌ستنیشانكرى بكه‌ت بۆ كاراكرنا پلێتا خوه‌ و دڤێت سه‌رۆكێ خێزانێ ب خوه‌ ئاماده‌بیت و به‌ڵگه‌نامێن پێدڤى یێن ره‌سه‌ن دگه‌ل خوه‌ ببه‌ت و گۆت: "نێزیكى هزار و 100 خێزانێن دهۆكێ یێن كو مووچێ وان ژ ملیۆنه‌ك و 500 هزار دیناران پتر ئاهێن خوارنێ یێن وان ناهێنه‌دان، ئه‌ڤه‌ دده‌مه‌كى دایه‌ كو بتنێ د ئه‌ڤ ساله‌ دا پلێتا ئاهێن خوارنێ بۆ هزار و 500 خێزانێن پرۆسا هه‌ڤژینیێ پێكئینایى و ئه‌وێن جودابووین هاتیه‌ چێكرن".

 

ل دووماهیێ ژى ناڤهاتى خویا كر كو ئه‌و دخوازیت وه‌زاره‌تا بازرگانى و پیشه‌سازى یا حكومه‌تا هه‌رێما كوردستانێ پتر دگه‌ل وان یا هاریكاربیت د بابه‌تێ به‌لاڤكرنا پلێتێن ئاهێن خوارنێ یێن ئه‌لكترۆنى دا و ب هیڤیا رێڤه‌به‌ریا وان و كارگێریا پارێزگه‌ها دهۆكێ بتنێ ڤه‌ نه‌هێلن.
رێوار محه‌مه‌د ره‌شید