ئه‌ڤرۆ به‌رێ بنیاتى بۆ ژماره‌كا پرۆژێن خزمه‌تگۆزارى ل دهۆكێ هاته دانان
دهۆك –KDP.info- سكرتێرێ رۆژنامه‌ڤانى یێ پارێزگارێ دهۆكێ دیار كر كو كاروانێ ئاڤه‌دانیێ ل سه‌رده‌مێ كابینا نه‌هێ یا حكومه‌تا هه‌رێما كوردستانێ ل پارێزگه‌ها دهۆكێ یێ به‌رده‌وامه، ئه‌ڤرۆ رۆژا پێنجشه‌مبى 6/4/2023 پ.د.عه‌لى ته‌ته‌ر، پارێزگارێ دهۆكێ به‌رێ بنیاتى بۆ ژماره‌كا پرۆژێن خزمه‌تگۆزارى یێن جوراوجور ب گوژمێ نێزیكى سێ ملیار دیناران ل قه‌زا دهۆكێ دانا.
ملله‌ت عسمه‌ت، سكرتێرێ رۆژنامه‌ڤانى یێ پارێزگارێ دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو نوكه ژماره‌كا مه‌زن یا پرۆژێن خزمه‌تگۆزارى ل پارێزگه‌ها دهۆكێ د قووناغا بجهئینانێ دانه و هنده‌ك ژوان پرۆژان ژى د قووناغێن دووماهیێ یێن كارى دانه و ل ده‌مه‌كێ نێزیكى دێ هێنه ڤه‌كرن و كه‌ڤنه د خزمه‌تا وه‌لاتیان دا و د به‌رده‌وامیا بجهئینانا پرۆژێن نوى یێن خزمه‌تگۆزارى دا ئه‌ڤرۆ ژى پارێزگارێ دهۆكێ به‌رێ بنیاتى ب گوژمێ دوو ملیار و 704 ملیۆن و 211 هزار دیناران بۆ ژماره‌كا پرۆژێن نوى یێن خزمه‌تگۆزارى ل قه‌زا دهۆكێ دانا، ئه‌ڤه د ده‌مه‌كى دایه نوكه رێژا كارى د ڤان پرۆژان دا یێن كو ئه‌ڤرۆ به‌رێ بنیاتى بۆ هاتیه دانان دناڤبه‌را 5% هه‌تا 60% دایه.
ناڤهاتى ئاماژه دا وێ چه‌ندێ كو ژوان پرۆژێن ئه‌ڤرۆ به‌رێ بنیاتى بۆ هاتیه دانان پرۆژێ سه‌خبێركرنا تۆرێن كاره‌بێ دگه‌ل دانانا گوهۆركا ل تاخێ زركا یێ قه‌زا دهۆكێ، د هه‌مان ده‌م دا به‌رێ بنیاتى بۆ پرۆژێ نووژه‌نكرنا 15 قوتابخانا ل قه‌زا ناڤهاتى و پرۆژێ ئاڤاكرنا قوتابخانه‌كا 18 رێزى ل ئێمینكێ هاته دانان.
رێوار محه‌مه‌د ره‌شید
