فراکسیۆنی پارتی: خۆمان زۆر باش بۆ پەسەندکردنی پڕۆژەیاسای بودجە ئامادە کردووە
بەغدا -KDP.info- ئەندامێکی فراکسیۆنی پارتی دیموکراتی کوردستان ئاشکرای کرد کە وەکوو فراکسیۆنی پارتی زۆر باش خۆیان ئامادە کردووە بۆ پەسەندکردنی پڕۆژەیاسای بودجە و ڕێککەوتنی هەرێم و بەغدا چۆن هاتووە کار دەکەن بەو شێوەیە پەسەند بکرێت، چونکە بڕیارە لەم هەفتەیەدا خوێندنەوەی یەکەم بۆ پڕۆژەیاسای بودجە بکرێت.
ئیبراهیم قەبۆ بۆ ماڵپەڕی فەرمیی پارتی دیموکراتی کوردستان گوتی: ''پڕۆژەیاسای بودجەی گشتیی عێراق لە پەرلەمان ڕەوانەی لیژنەی دارایی کراوە بۆ ئەوەی ئامادە بکرێت و ڕۆژی چوار شەممە خوێندنەوەی یەکەمی بۆ دەکرێت و دواتریش ئاراستەی لیژنەکان دەکرێت بۆ ئەوەی ڕای خۆیانی لەسەر دەربڕن لە هەموو لیژنەکان.''
ئەو پەرلەمانتارەی پارتی گوتیشی: ''خۆمان زۆر باش بۆ پەسەندکردنی پڕۆژەیاسای بودجە ئامادە کردووە و هەوڵ دەدەین ئەو ڕێککەوتنەی هەرێم و بەغدا لە بودجە جێگیر کراوە بەو شێوەیە خاڵ بە خاڵ وەکوو خۆی پەسەند بکرێت.''
قەبۆ باسی لەوەش کرد: ''هەوڵ دەدەین هەرچی خاڵێکی دیکەی پێویست بێت و لە بەرژەوەندیی هەرێمی کوردستان بێت لە پڕۆژەیاسای بودجەدا جێگیر و پەسەند بکرێت.''
بڵند ئیبراهیم
