پارێزگارێ دهۆكێ: 330 گوندێن پارێزگه‌ها دهۆكێ ژ ئه‌گه‌رێ هه‌بوونا هێزێن چه‌كدار ل ده‌ڤه‌رێ ئاڤه‌دان نه‌بووینه
دهۆك–KDP.info- د به‌رده‌وامیا بجهئینانا پرۆژێن نوى یێن خزمه‌تگۆزارى دا ل ده‌ڤه‌رێن جوداجودا یێن پارێزگه‌ها دهۆكێ ئه‌ڤرۆ رۆژا پێنجشه‌مبى 30/3/2023 پ.د.عه‌لى ته‌ته‌ر، پارێزگارێ دهۆكێ ب گوژمێ پترى چار ملیار دیناران به‌رێ بنیاتى بۆ ژماره‌كا پرۆژێن نوى یێن خزمه‌تگۆزارى ل ناحیا چه‌مانكێ یا سه‌ر ب قه‌زا ئامێدیێ ڤه دا و د هه‌مان ده‌م دا دوو پرۆژێن نوى یێن خزمه‌تگۆزارى ژى ل هه‌مان ناحیه هاتنه ڤه‌كرن و گۆت: "330 گوندێن پارێزگه‌ها دهۆكێ ژ ئه‌گه‌رێ هه‌بوونا هێزێن چه‌كدار ل ده‌ڤه‌رێ ئاڤه‌دان نه‌بووینه".
پ.د.عه‌لى ته‌ته‌ر، پارێزگارێ دهۆكێ ئاشكرا كر كو ئه‌ڤرۆ ب گوژمێ چار ملیار و 77 ملیۆن دیناران به‌رێ بنیاتى بۆ ژماره‌كا پرۆژێن نوى یێن خزمه‌تگۆزارى یێن جوراوجور ل ناحیا چه‌مانكێ هاته دانان و دوو پرۆژێن نوى یێن خزمه‌تگۆزارى ژى ل ناحیا ناڤهاتى هاتنه ڤه‌كرن و دێ دبه‌رده‌وام بین ل سه‌ر بجهئینانا پرۆژێن ب ڤى شێوه‌یى و گۆت: "به‌هراپتریا پرۆژێن ل سێ سالێن بورى ژ ئه‌نجامێ سه‌ره‌دانا سه‌رۆكێ حكومه‌تا هه‌رێما كوردستانێ بوویه بۆ ڤان ده‌ڤه‌رێن ژ به‌ر هه‌ر ئه‌گه‌ره‌كێ بیت وه‌كو پێدڤى پرۆژێن خزمه‌تگۆزارى لێ نه‌هاتبنه ئه‌نجامدا".
پارێزگارێ دهۆكێ ئاماژه دا وێ چه‌ندێ كو ژ سه‌رجه‌مێ نێزیكى 700 پرۆژێن خزمه‌تگۆزارى بتنێ 11 پرۆژه ماینه هه‌تا نوكه نه‌كه‌فتینه د بوارێ بجهئینانێ دا، به‌لێ نوكه ئه‌م یێ كار ل سه‌ر وێ چه‌ندێ دكه‌ین وان پرۆژان ژى ره‌وانه‌یى قووناغا بجهئینانێ بكه‌ین و گۆت"70% ژ پرۆژێن د ڤان سێ سالان دا كه‌فتینه د قووناغا بجهئینانێ دا ب دووماهى هاتینه و كه‌فتینه د خزمه‌تا وه‌لاتیان دا".
ژ ئالیه‌كێ دى ڤه پارێزگارێ دهۆكێ گۆت: "330 گوندێن پارێزگه‌ها دهۆكێ ژ ئه‌گه‌رێ هه‌بوونا هێزێن چه‌كدار ل ده‌ڤه‌رێ ئاڤه‌دان نه‌بووینه، ئانكو ل دووڤ وان ئامارێن ل به‌رده‌ست دناڤبه‌را 25% هه‌تا 30% خه‌لكێ پارێزگه‌ها دهۆكێ ژ به‌ر هه‌مان ئه‌گه‌ر نه‌شێن ڤه‌گه‌ڕنه سه‌ر گوندێن خوه ئه‌ڤ چه‌نده ژى دبیته ئه‌گه‌رێ بلندبوونا رێژا بێ كاری و هه‌ژاریێ، ژ بلى ڤه‌حه‌واندنا ژماره‌كا مه‌زن یا ئاواره و په‌نابه‌ران ل پارێزگه‌ها دهۆكێ و ئه‌و كاودانێن ئه‌م تێدا دژین".
رێوار محه‌مه‌د ره‌شید
