ئه‌ڤ ساله به‌رهه‌مێ گه‌نمى دێ گه‌له‌ك ژ سالێن بورى زێده‌تر لێ هێت
دهۆك–KDP.info- رێڤه‌به‌رێ گشتى یێ چاندنێ ل پارێزگه‌ها دهۆكێ دیار كر كو ئه‌ڤ ساله به‌راورد دگه‌ل سالێن بورى رێژا چاندنا گه‌نمى ل پارێزگه‌ها دهۆكێ به‌ر ب زێده‌بوونێ چوویه و پترى 600 هزار دونه‌مێن ئه‌ردێ گه‌نم لێ هاتیه چاندن ب هیڤیا باران بارینێ ڤه‌نه.
ئه‌حمه‌د جه‌میل، رێڤه‌به‌رێ گشتى یێ چاندنێ ل پارێزگه‌ها دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو د ئه‌ڤ ساله دا گه‌نم ل سه‌ر رووبه‌رێ نێزیكى 800 هزار دونه‌مێن ئه‌ردى ل سنوورێ پارێزگه‌ها دهۆكێ هاتیه چاندن و هه‌كه به‌راوردی دگه‌ل سالێن بورى بهێته‌كرن ئه‌ڤ ساله به‌رهه‌مێ گه‌نمى دێ گه‌له‌ك ژ سالێن بورى زێده‌تر لێ هێت.
ناڤهاتى ئاماژه دا وێ چه‌ندێ كو ئه‌و بارانێن د ئه‌ڤ ساله دا ل پارێزگه‌ها دهۆكێ بارین هه‌تا نوكه قه‌ره‌بوویا سالێن بورى نه‌كریه، ژ به‌ر كو د سالێن بورى دا رێژا بارانان گه‌له‌ك كێم ببوو و زیانه‌كا مه‌زن گه‌هه‌هشبوو جۆتیارێن پارێزگه‌ها دهۆكێ ب تایبه‌تى ژى ل قه‌زا سێمێلێ به‌رهه‌مێ گه‌نمێ جۆتیاران كێم ببوو، ئه‌ڤه دده‌مه‌كى دایه ژ سه‌رجه‌مێ رووبه‌رێ نێزیكى 800 هزار دونه‌مێن ئه‌ردى یێ كو ئه‌ڤ ساله گه‌نم ل سه‌ر هاتیه چاندن پترى 650 هزار دونه‌مان ب هیڤیا باران بارینێ ڤه‌نه، ژ بلى ئه‌و گه‌نمێ هاتیه چاندن و جۆتیار ئاڤ دده‌ن.
رێوار محه‌مه‌د ره‌شید
