به‌رێ بنیاتى بۆ ژماره‌كا پرۆژێن خزمه‌تگۆزارى ل ئامێدیێ هاته دانان
دهۆك–KDP.info- د به‌رده‌وامیا بجهئینانا پرۆژێن نوى یێن خزمه‌تگۆزارى دا ل ده‌ڤه‌رێن جوداجودا یێن پارێزگه‌ها دهۆكێ، پ.د.عه‌لى ته‌ته‌ر، پارێزگارێ دهۆكێ ئه‌ڤرۆ رۆژا ئێكشه‌مبى 26/3/2023 به‌رێ بنیاتى بۆ ژماره‌كا پرۆژێن نوى یێن خزمه‌تگۆزارى ب گوژمێ پترى چار ملیار دیناران ل قه‌زا ئامێدیێ دانا.
ملله‌ت عسمه‌ت، سكرتێرێ رۆژنامه‌ڤانى یێ پارێزگارێ دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو كاروانێ ئاڤه‌دانیێ ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ ل هه‌مى ده‌ڤه‌رێن سنوورێ پارێزگه‌ها دهۆكێ یێ به‌رده‌وامه و ئه‌ڤرۆ پارێزگارێ دهۆكێ به‌رێ بنیاتى بۆ ژماره‌كا پرۆژێن نوى یێن خزمه‌تگۆزارى ب گوژمێ چار ملیار و 475 ملیۆن و 754 هزار دیناران ل قه‌زا ئامێدیێ دانا و گۆت: "ئه‌ڤرۆ به‌رێ بنیاتى بۆ پرۆژێ چێكرنا رێیێن ناڤخۆ ل كۆمه‌لگه‌ها قه‌دشێ و هه‌ر ئێك ژ ناحیێن سه‌رسنك و بامه‌رنێ هاته دانان، د هه‌مان ده‌م دا به‌رێ بنیاتى بۆ پرۆژێ چێكرنا سولینه‌كا ئاڤرێژ ب درێژاهیا 500 مه‌تران ل چه‌پا سركى – كانیا مالا و پرۆژێ سه‌بكرنا رێیێن ناڤخۆ دگه‌ل شوستێن رێیێ و دانانا كیربستونى ل ئامێدیێ و دێمكى شینى و كانیا مالا و چێكرنا رێێن گوندان و پرۆژێ گه‌هاندن و سه‌خبێریا كاره‌بێ ل ئامێدیێ و پرۆژێ دابینكرنا كه‌لوپه‌لێن كاره‌بێ و روناهیێ بۆ سه‌خبێركرنا كاره‌با ئامێدیێ و روناهیكرنا قه‌زا ئامێدیێ و پرۆژێن جویێن ئاڤدانێ و تورا ئاڤێ ل چه‌ندین تاخێن سه‌نته‌رێ قه‌زا ئامێدیێ هاته دانان".
ناڤهاتى ئاماژه دا وێ چه‌ندێ كو د چارچۆڤێ سه‌ره‌دانا پارێزگارێ دهۆكێ دا بۆ قه‌زا ئامێدیێ به‌رێ بنیاتى بۆ پرۆژێ ئاڤاكرنا قوتابخانه‌كا 12 رێزى ل مریبكا و نووژه‌نكرنا پێنج قوتابخانان ل سنوورێ هه‌مان قه‌زا هاته دانان و گۆت: "ئه‌ڤ پرۆژێن ئه‌ڤرۆ به‌رێ بنیاتى بۆ هاتیه دانان د قووناغێن جوداجودا یێن بجهئینانێ دانه".
رێوار محه‌مه‌د ره‌شید
