دەست ب دەرخستنا کارتا نشتیمانی ل قەزا شێخان هاتەکرن

دهۆک -KDP.info- د رێورەسمەکی دا ئەڤرۆ رۆژا دووشەمبی 13/3/2023 ب ئامادەبوونا سیروان رۆژبەیانی، جێگرێ پارێزگارێ نەینەوا کو سەر ب پشکا پارتی دیموکراتی کوردستان ڤەیە و سەردار یەحیا، قائیمقامێ قەزا شێخان و عەمید فەخری ئەحمەد رێڤەبەرێ پۆلیسێن پارێزگەها دهۆکێ و ژمارەکا بەرپرسێن حکومی یێن دەڤەرێ بۆ جارا ئێکێ دەست ب دەرخستنا کارتا نشتیمانی ل قەزا شێخان هاتەکرن.

سیروان رۆژبەیانی، جێگرێ پارێزگارێ نەینەوا دیار کر کو ب هاریکاریا هەمی لایەنێن پەیوەندیدار ئەڤرۆ رێڤەبەریا کارتا نشتیمانی ل قەزا شێخان هاتە ڤەکرن و ب ڤەکرنا ڤێ رێڤەبەریێ دێ خەلکێ سنوورێ قەزا ناڤهاتی گەلەک یێ مفادار بیت.

ناڤهاتی ئاماژە دا وێ چەندێ کو وەلاتی دشێن ب رێیا ڤێ کارتێ دەستووریا هاژووتنا ترۆمبێلێ و پاسپۆرتێ و هتد..... دەربێخن و بۆ برێڤەبرنا گەلەک مامەلێن دی ژی دێ مفا ژێ هێتە وەرگرتن، ژ بەر ڤێ چەندێ داخواز ژ وەلاتیان کر سەرەدانا رێڤەبەریا ناڤهاتی بکەن بۆ ب رێڤەبەرنا مامەلێن خوە یێن دەرخستنا  کارتا ناڤهاتی و گۆت: "ئەم دێ هەمی بزاڤان کەین ب هارکاریا سازیێن پەیوەندیدار خزمەتێن زێدەتر پێشکێشی وەلاتیێن قەزا شێخان بکەین".

رێوار محەمەد رەشید