ئه‌ڤرۆ به‌رێ بنیاتى بۆ ژماره‌كا پرۆژێن خزمه‌تگۆزارى ل ئیدارا سه‌ربه‌خۆ یا زاخۆ هاته دانان
دهۆك –KDP.info- د به‌رده‌وامیا بجهئینانا پرۆژێن نوى یێن خزمه‌تگۆزارى دا یێن كو ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ ل سنوورێ ئیدارا سه‌ربه‌خۆ یا زاخۆ دهێنه بجهئینان ئه‌ڤرۆ رۆژا دووشه‌مبى 13/3/2023 گۆهدار شێخۆ، سه‌رپه‌رشتێ ئیدارا ناڤهاتى به‌رێ بنیاتى ب گوژمێ سێ ملیار و 461 ملیۆن و 340 هزار و 750 دیناران بۆ ژماره‌كا پرۆژان دانا.
گۆهدار شێخۆ، سه‌رپه‌رشتێ ئیدارا سه‌ربه‌خۆ یا زاخۆ دیار كر كو ب هه‌لكه‌فتا سه‌رهلدانا زاخۆ ئه‌ڤرۆ به‌رێ بنیاتى بۆ ژماره‌كا پرۆژان هاته دانان ژوان پرۆژان به‌رێ بنیاتى بۆ پرۆژێ ئاڤاكرنا نه‌خۆشخانا زارۆیان هاته دانان كو ئه‌ڤ نه‌خۆشخانه ب هه‌ڤپشكى دگه‌ل شێخ باز ب گوژمێ پترى دوو ملیار دیناران دێ هێته بجهئینان، د هه‌مان ده‌م دا به‌رێن بنیاتى بۆ پرۆژێ ئاڤاكرنا بنگه‌هه‌كێ ساخله‌میێ ل تاخێ سێمالكا و پرۆژێ چێكرنا پاركه‌كێ و چێكرنا چه‌ندین جادان ل تلكه‌به‌رێ هاتنه دانان و گۆت: "ئه‌م شانازیێ دكه‌ین كو كوردستان رۆژ بۆ رۆژێ به‌ر ب ئاڤه‌دانیێ دچیت كو د ده‌مێ بوورى دا یێ كو ئیدارا سه‌ربه‌خۆ یا زاخۆ هاتیه راگه‌هاندن ژماره‌كا مه‌زن یا پرۆژێن خزمه‌تگۆزارى د بوارێن جودا دا ب سه‌رپه‌رشتیا راسته‌وخۆ یا سه‌رۆكێ حكومه‌تا هه‌رێما كوردستانێ هاتینه ئه‌نجامدان".
سه‌رپه‌رشتێ ئیدارا سه‌ربه‌خۆ یا زاخۆ ئاماژه دا وێ چه‌ندێ كو ب هه‌مان هه‌لكه‌فت ژ بلى وان پرۆژێن كو به‌رێ بنیاتى ئه‌ڤرۆ بۆ هاتیه دانان دێ چه‌ندین كار و چالاكیێن دى ژى ل سنوورێ ئیدارا سه‌ربه‌خۆ یا زاخۆ هێنه ئه‌نجامدان و گۆت: "ئه‌م بۆ خه‌لكى هه‌میێ دیار دكه‌ین كو كوردستان وه‌لاته‌كێ ئارامه و به‌ره‌ف پێشكه‌فتنه‌كا زێده‌تر دچیت و كاروانێ ئاڤه‌دانیێ ژى دێ یێ به‌رده‌وام بیت، ب هه‌لكه‌فتا هاتنا جه‌ژنا نه‌ورۆزێ و هه‌یڤا ره‌مه‌زانا پیرۆز چه‌ندین به‌رنامێن باش هاتینه دانان و ل سنوورێ ئیدارا سه‌ربه‌خۆ یا زاخۆ دێ هێنه بجهئینان".
رێوار محه‌مه‌د ره‌شید
