بیره‌وه‌ریا سه‌رهلدانا ده‌ڤه‌را به‌هدینان دێ هێته ساخكرن
دهۆک-KDP.info- ب هه‌لكه‌فتا بیره‌وه‌ریا سه‌رهلدانا باژێرێ دهۆكێ و قه‌زایێن ئاكرێ و به‌رده‌ره‌ش دێ چه‌ندین چالاكیێن جوداجودا ب مه‌ره‌ما ساخكرنا ڤێ بیره‌وه‌ریێ هێنه ئه‌نجامدان و بڕیاره ل قه‌زایێن دى یێن پارێزگه‌ها دهۆكێ ژى ژماره‌كا چالاكیان بهێنه ئه‌نجامدان.
حه‌سه‌ن فه‌تاح، په‌یڤدارێ رێڤه‌به‌ریا ره‌وشه‌نبیرى و هونه‌رى ل پارێزگه‌ها دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو ب پشته‌ڤانیا پ. د. عه‌لى ته‌ته‌ر، پارێزگارێ دهۆكێ رێڤه‌به‌ریا گشتى یا ره‌وشه‌نبیرى و هونه‌رى ل پارێزگه‌ها دهۆكێ دێ بیره‌وه‌ریا سه‌رهلدانا باژێرێ دهۆكێ ل رۆژا 14/3/2023 ب پشكداریا هونه‌رمه‌ندان (شاكر محه‌مه‌د ئه‌مین) و (رێكێش سه‌یرانى) و تیپا رباد یا مۆزیكێ ل هۆلا كۆنفرانسان ل زانكۆیا دهۆك ساخ كه‌ت و گۆت: "ب هه‌لكه‌فتا بیره‌وه‌ریا سه‌رهلدانا قه‌زایێن ئاكرێ و به‌رده‌ره‌ش ژى ئه‌ڤرۆ رۆژا 12/3/2023 دێ كۆنسێرته‌ك ب پشكداریا هونه‌رمه‌ند (محه‌مه‌د ته‌ها ئاكره‌ى) هێته‌گێڕان و پێشانگه‌هه‌كا شێوه‌كارى ژى دێ هێته ڤه‌كرن و كوڕه‌كێ هه‌لبه‌ست خواندنێ ژى ب هه‌مان هه‌لكه‌فت هاتیه رێكخستن".
ناڤهاتى ئاماژه دا وێ چه‌ندێ كو ساخكرنا بیره‌وه‌ریا سه‌رهلدانا هه‌ر ده‌ڤه‌ره‌كێ په‌یوه‌ندى ب بیردانكێ ڤه هه‌یه و یا گرنگه به‌ره‌بایێ نوى دیرۆكا خوه بزانیت و پێزانین ل سه‌ر وێ چه‌ندێ هه‌بن ملله‌تێ وان د چو قووناغ ڕا ده‌ربازبوویه و هه‌ر ملله‌ته‌كێ خودان دیرۆك بیت خودان شارستانیه‌ت و ره‌سه‌ناتیه ژ به‌ر ڤێ چه‌ندێ ژى یا گرنگه هه‌مى بیره‌وه‌ریێن ب ڤى شێوه‌یى بهێنه ساخكرن، ب تایبه‌تى بیره‌وه‌ریا سه‌رهلدانێ گه‌لێ كورد ژ قووناغه‌كێ بره قووناغه‌كا دى كو سه‌رهلدان ڤه‌رێژ و درێژه‌پێده‌را هه‌ر دو شوره‌شێن ئیلۆن و گۆلانێ بوو.
رێوار محه‌مه‌د ره‌شید
