فراکسیۆنی پارتی داوای پێکهێنانی لیژنەیەکی هاوبەش لە نێوان پەرلەمانی ئەورووپا و عێراق دەکات

بەغدا -KDP.info- فراکسیۆنی پارتی دیموکراتی کوردستان لە پەرلەمانی عێراق بۆ هەماهەنگی و هاوکاریی زیاتر لە نێوانیان داوا دەکات کە لیژنەیەکی هاوبەش لە نێوان پەرلەمانی عێراق و ئەورووپا پێک بێت.

لە ڕاگەیاندراوێکدا کە کۆپییەکی بە دەست ماڵپەڕی فەرمیی پارتی دیموکراتی کوردستان گەیشتووە، هاتووە: ''سەرۆکی فراکسیۆنی پارتی دیموکراتی کوردستان لە ئەنجوومەنی نوێنەرانی عێراق و ئەندامی لیژنەی پەیوەندییەکانی دەرەوە لە پەرلەمان،  د. ڤیان سەبری، داوای پێکهێنانی لیژنەیەکی هاوبەش لە نێوان پەرلەمانی ئەورووپا و پەرلەمانی عێراق دەکات بە ئامانجی زیادکردنی هەماهەنگی و هاوکاریی دووقۆڵی و چەسپاندنی پەیوەندیی نێوانیان و ئاڵوگۆڕی ئەزموون لە بواری پەرلەمانی و سەردانکردنی شاندی پەرلەمانی لەلایەن هەردوولاوە.''

لە ڕاگەیندراوەکەدا هاتووە: ''د. ڤیان سەبری جەختی لە گرنگیی ئەم لیژنەیە و پێکهێنانی کردەوە بۆ پتەوکردنی پەیوەندی و هاوکاری و هەماهەنگیی نێوان ئەنجوومەنی نوێنەرانی عێراق و پەرلەمانی ئەورووپا، بەتایبەت لە بوارەکانی ئەمنی و سەربازی و ئابووری و بازرگانی و وەبەرهێنان و پاڵپشتی و پەرەپێدانی کەرتی تایبەت، هەروەها هاوکاری لە بوارەکانی پرسی کۆچی نایاسایی و مافی مرۆڤ و منداڵان، هاوکات هاوکاری لە بواری نەوت و گاز و یاسادانان و چاودێری.''

ئەو داواکارییەی سەرۆکی فراکسیۆنی پارتی دیموکراتی کوردستان لە چوارچێوەی کۆبوونەوەی لیژنەی پەیوەندییەکانی دەرەوەی پەرلەمانی عێراق لەگەڵ شاندێکی یەکێتیی ئەورووپا بە سەرۆکایەتیی خاتوو سارا سکێتیدال، ئەندامی پەرلەمانی سوید بوو.

بڵند ئیبراهیم