نێچیرڤان بارزانى: به‌رژه‌وه‌ندى و به‌هاى هاوبه‌ش لەگەڵ ئەمەریكا كۆمانده‌كاته‌وه
پاش كۆبوونه‌وه‌ى ئه‌مڕۆ سێشه‌ممه 2023/3/7ى به‌ڕێز نێچیرڤان بارزانى، سه‌رۆكى هه‌رێمى كوردستان له‌گه‌ڵ به‌ڕێز لۆید ئۆستن وه‌زیرى به‌رگریى ئه‌مه‌ریكا، ده‌رباره‌ى ناوه‌ڕۆكى كۆبوونه‌وه‌كه، لێدوانى ڕۆژنامه‌وانییان به كه‌ناڵه‌كانى ڕاگه‌یاندن و ڕۆژنامه‌نووسان دا، ئه‌مه ده‌قى هه‌ردوو لێدوانه‌كه‌یه:
سه‌رۆك نێچیرڤان بارزانى:
ڕۆژ باش،
زۆر خۆشحاڵم كه ئه‌مڕۆ لێره پێشوازى له به‌ڕێز لۆید ئۆستن وه‌زیرى به‌رگریى ئه‌مه‌ریكا و دۆستى دێرینى گه‌لى كوردستان و عێراق ده‌كه‌م. بێگومان هاتنی بەڕێزیان په‌یامێكى گرنگ و ڕوونى دڵنیاكردنه‌وه و پشتگیریى ئه‌مه‌ریكایه له هه‌رێمى كوردستان و عێراق.
كۆبوونه‌وه‌یه‌كى باشمان هه‌بوو. باسمان له په‌یوه‌ندییه‌كانى هه‌ردوولا له‌سه‌ر بنه‌ماى ڕێككه‌وتنى چوارچێوه‌ى ستراتیژیى عێراق و ئه‌مه‌ریكا كرد. جه‌ختمان له پێویستیى به‌رده‌وامیى هاریكاریى هاوبه‌ش و پشتگیریى ئه‌مه‌ریكا و هاوپه‌یمانانی نێوده‌وڵه‌تى بۆ عێراق و هه‌رێمى كوردستان كرده‌وه بۆ به‌ره‌نگاربوونه‌وه‌ى تیرۆر. هه‌روه‌ها باسمان له گرنگیى هاریكاریى پێشمه‌رگه و سوپاى عێراق كرد بۆ ڕووبه‌ڕووبوونه‌وه‌ى داعش.
جه‌ختمان له گرنگیى به‌رده‌وامیى پشتیگریى ئه‌مه‌ریكا و وڵاتانى دۆست له پرۆسه‌ى چاكسازى له وه‌زاره‌تی پێشمەرگە و ڕێكخستنه‌وه‌ى پێشمه‌رگه كرده‌وه. دڵنیامان كرده‌وه كه سوورین له‌سه‌ر ڕیكخستنه‌وه‌ى پێشمه‌رگه و ته‌گه‌ره‌كانى به‌رده‌میان تێده‌په‌ڕێنین. هه‌روه‌ها له هه‌وڵه‌كانمان به‌رده‌وام ده‌بین بۆ یه‌كڕیزى و چاره‌سه‌ركردنى كێشه‌كانی ناوخۆى هه‌رێمى كوردستان.
هاوڕا بووین كه چاره‌سه‌ركردنى كێشه‌كانى هه‌ولێر ـ به‌غدا، ئارامى و سه‌قامگیریى سیاسى و ئه‌منى و ئابوورى بۆ عێراق له‌گه‌ڵ خۆیدا ده‌هێنێت. هاوڕا بووین له‌سه‌ر گرنگیى پشتگیرى له حكوومه‌تى فیدراڵیى عێراق و كاركردنى پێكه‌وه‌ى هاوبه‌شمان له ناوچه‌كه بۆ پاراستنى سه‌قامگیرى. هه‌روه‌ها دووپاتمان كرده‌وه كه هه‌رێمى كوردستان وه‌ك هه‌میشه فاكته‌ر‌ى ئارامى و سه‌قامگیرى ده‌بێت.
جه‌نابى وه‌زیر،
دووباره زۆر زۆر به‌خێر بێن بۆ هه‌ولێر، سوپاسى ڕۆڵى تایبه‌تى جه‌نابتان ده‌كه‌ین له هاوكاریكردنى پێشمه‌رگه. سوپاسى ئه‌مه‌ریكا ده‌كه‌ین بۆ پشتگیریى به‌رده‌وامى له عێراق و هه‌رێمى كوردستان. ئێمه به‌رژه‌وه‌ندى و به‌هاى هاوبه‌ش لەگەڵ ئەمەریكا كۆمانده‌كاته‌وه. پێكه‌وه ده‌توانین ئارامى و سه‌قامگیریى عێراق و به‌رژه‌وه‌ندیى هاوبه‌ش بپارێزن.
زۆر سوپاس بۆ هاتنتان، ڕۆژێكى خۆش.
به‌ڕێز لۆید ئۆستن، وه‌زیرى به‌رگریى ئه‌مه‌ریكا:
جەنابی سەرۆك،
زۆر خۆشحاڵ بووم كە ئەمڕۆ جەنابتانم بینی. هەستێكی خۆشم هەیە كە ئەمڕۆ لە هەولێرم. بۆ ماوەی دەیان ساڵ شان بە شانی یەكتر لە هەندێك كاتی زۆر سەختدا پێكه‌وه كارمان كردووە. لە سەردەمی ”ئۆپەراسیۆنی دابینكردنی ئارامی” تا شەڕی ئێستا و هاوبەشمان لە دژی داعش بە بەردەوامی پێكه‌وه كارمان كردووە.
ئەمەریكا و عێراق بە هەرێمی كوردستانیشەوە هەنگاوی زۆر مەزنمان بۆ گەڕانەوەی سەروەریی عێراق ناوە. لە چوارچێوەی هاوپەیمانیی نێودەوڵەتیدا بۆ تێكشكاندنی داعش، زیاتر لە پەنجا هەزار كیلۆمەتری دووجامان لە مۆتەكەی داعش ئازاد كردووە، هەروەها زیاتر لە چوار ملیۆن و پێنجسه‌د هه‌زارمان لە خەڵكی عێراق ڕزگار كردووە.
بۆیە لە جێی خۆیەتی دەستخۆشی لەو ڕۆڵ و یارمەتیدانە پڕ بەهایە بكەم كە بەتایبەتى لەلایەن پێشمەرگەوە وەك بەشێك لە هێزەكانی ئاسایشی عێراق، لەو جەنگەدا پێشكەش كراوە.
دەبێت جەخت لەوە بكەمەوە كە هێزەكانی ئەمەریكا ئامادەن لەسەر بانگێشتی حكوومەتی عێراق لە عێراقدا بمێننەوە بۆ پشتگیریكردنی هەڵمەتی شەڕی عێراق دژی داعش. ئێمە خۆشحاڵین كە توانیمان پشتگیری لە هێزەكانی ئێوە بكەین و بەرگری لە خەڵكی عێراق بكەین.
هەروەها حەز دەكەم پشتگیریی خۆمان بۆ ئەو یاداشتى لێكگەیشتنە ڕابگەیەنین كە وەزارەتی بەرگریی ئەمەریكا ساڵی پار لەگەڵ وەزارەتی پێشمەرگەی ئێوە واژۆی كرد. ئەو یاداشتە جەخت لە ئامادەییی ئێمە دەكاتەوە بۆ بەردەوامبوون لە دابینكردنی یارمەتیی ئەمنی بۆ هێزەكانی ئێوە و لە هەمان كاتدا بۆ چاكسازیی دامەزراوەیی.
داعش بەردەوامە لە هەڕەشە لە ژیان و گوزەرانی خەڵكی عێراق، بۆیە هاوبەشی و هاوكاریی بەردەوامی ئێمە زۆر گرنگە، هەروەها هەماهەنگیی هێزەكانی پێشمەرگەی هەرێمی كوردستان لەگەڵ هێزەكانی ئاسایشی عێراقی پێویستە، بەتایبەتی لە لیوا هاوبەشەكاندا.
بەداخەوە داعش تاكە هەڕەشەی سەر هەرێم نییە. وڵاتە یەكگرتووەكانی ئەمەریكا سەركۆنەی هێرشە بەردەوامەكانی ئێران دەكات كە لەودیوی سنوورەوە دەكرێن. ئەم هێرشانە پێشێلكارین بۆ سەر سەروەریی عێراق، ژیانی عێراقییەكان دەخاتە مەترسییەوە و خەڵكی عێراق لە پێشكەوتن ڕادەگرێت.
ئەمەریكا بەردەوام دەبێت لە پاڵپشتی لە خەڵكی عێراق. عێراق بۆ ئەوەی بتوانێت هەموو تواناكانی خۆی بەكاربهێنێت، پێویستە هەولێر و بەغدا پێكه‌وه كار بۆ بەرژوەندیی هەموو عێراقییەكان بكەن. پێویستە سەركردە كوردەكانیش ناكۆكی و جیاوازییەكانیان بەلاوە بنێن و یەك بگرن بۆ مسۆگەركردنی هەرێمی كوردستانی عێراقی خۆشگوزەران و ئارام.
جەنابی سەرۆك،
سوپاس بۆ خانەخوێیی جەنابتان و تیمەكەتان.
سوپاس بۆ ئەو گفتوگۆیە زۆر باشەی كە هەمانبوو و بە پەرۆشییەوە دەڕوانینە بەهێزكردنی زیاتری هاوبەشیمان.
