- د.ڤیان سلێمان: یه‌كسانى و دادپه‌روه‌رى و رێزا ئافره‌تا كوردستانى ژ رێبازا پیرۆزا بارزانیێ نه‌مر هاتیه وه‌رگرتن
- رۆژا جیهانیا ئافره‌تان ل هه‌رێمێ دێ هێته ساخكرن
دهۆك –KDP.info- سكرتێرا ئێكه‌تیا ئافره‌تێن كوردستانێ دیار كر كو ب هه‌لكه‌فتا 8ى ئادارێ رۆژا جیهانیا ئافره‌تان دێ چه‌ندین كار و چالاكیێن جوراوجور ل سه‌رانسه‌رى هه‌رێما كوردستانێ هێنه ئه‌نجامدان، ب هه‌مان هه‌لكه‌فت دێ چه‌ندین ئافره‌تان ژى هێنه خه‌لاتكرن.
د.ڤیان سلێمان، سكرتێرا ئێكه‌تیا ئافره‌تێن كوردستانێ بۆ ماڵپه‌رێ فه‌رمیێ پارتى دیموكراتى كوردستان دیار كر كو هه‌مى وه‌رزان ئه‌و وه‌كو سكرتاریه‌تا ئێكه‌تیا ئافره‌تێن كوردستانێ پلانا خوه بۆ ئه‌نجامدانا كار و چالاكیێن جوداجودا ددانن و ب تایبه‌تى بۆ هه‌یڤا ئادارێ كو هه‌یڤا خوه‌شى و نه‌خوشیێن ملله‌تێ كورده و كۆمه‌كا هه‌لكه‌فتێن نه‌ته‌وه‌یى و نشتیمانێ د ناڤ دا هه‌نه و رۆژا جیهانیا ئافره‌تان ژى دكه‌ڤیته د ڤێ هه‌یڤێ دا، ژ به‌ر ڤێ چه‌ندێ ژى بۆ وان وه‌كو ئێكه‌تیا ئافره‌تێن كوردستانێ ڤێ هه‌یڤێ دوو جاران گرنگیا خوه هه‌یه و گۆت: "ب هه‌لكه‌فتا 8ى ئادارێ كۆمه‌كا چالاكیێن جوراوجور ژوان فیسته‌ڤالێن هونه‌رى و پێشانگه‌هێن كلتۆرى و پانێل و هتد.... ل سه‌ر ئاستێ هه‌مى ناڤه‌ند و ئه‌نجومه‌نێن ئافره‌تان ل هه‌رێما كوردستانێ دێ هێنه ئه‌نجامدان و د هه‌مان ده‌م دا سمینار د بوارێن نشتیمانپه‌روه‌ریێ دا و گرنگیدانا ئافره‌تێ و ژینگه‌ها جوانا كوردستانێ و هتد... دێ هێنه پێشكێشكرن و چه‌ندین خۆلێن پیشه‌یى ژى بۆ ئافره‌تان دێ هێنه ڤه‌كرن".
ناڤهاتیێ ئاماژه دا وێ چه‌ندێ كو د هه‌یڤا ئادارێ دا ئێكه‌تیا ئافره‌تان ژى وه‌كو هه‌ر ته‌خ و چینه‌كا دى یا جڤاكى دێ سه‌ره‌دانا مه‌زارێ نه‌مران ل بارزان كه‌ن و سۆز و په‌یمانێن خوه بۆ به‌رده‌وامیدانا رێباز پیرۆزا بارزانیێ نه‌مر نوى كه‌نه‌ڤه، ژ به‌ر كو یه‌كسانى و دادپه‌روه‌رى و رێزا ئافره‌تا كوردستانى ژ رێبازا پیرۆزا بارزانیێ نه‌مر هاتیه وه‌رگرتن و هاتیه جوداكرن ژ هه‌مى ئافره‌تێن دى یێن ده‌وروبه‌ر و گۆت: "ب هه‌لكه‌فتا 8ى ئادارێ چ رێوره‌سمێن پێشۆازیا مێهڤانان یێن كو ب مه‌ره‌ما پیرۆزباهى دخوازن سه‌ره‌دانا مه بكه‌ن ناهێنه ئه‌نجامدان، بتنێ دێ مه سه‌ره‌دانێن مه‌یدانى هه‌بن".
رێوار محه‌مه‌د ره‌شید
