دوو قوتابخانه ل ئامێدیێ دهێنه چێكرن
دهۆك–KDP.info- د به‌رده‌وامیا چێكرنا پرۆژێن كه‌رتێ په‌روه‌ردێ دا یێن كو ل سه‌رده‌مێ كابینا نه‌هێ یا حكومه‌تا هه‌رێما كوردستانێ دا ل سنوورێ قه‌زا ئامێدیێ دهێنه بجهئینان نوكه ب گوژمێ پترى سێ ملیار دیناران دوو قوتابخانه ل ئامێدیێ دهێنه چێكرن و ژماره‌كا دى یا قوتابخانان ل سنوورێ هه‌مان قه‌زا د قووناغا نووژه‌نكرنێ دانه.
وه‌جیه سه‌عید مسته‌فا، رێڤه‌به‌رێ په‌روه‌ردا قه‌زا ئامێدیێ بۆ ماڵپه‌رێ فه‌رمیێ پارتى دیموكراتى كوردستان دیار كر كو كابینا نه‌هێ یا حكومه‌تا هه‌رێما كوردستانێ گرنگیه‌كا مه‌زن ب كه‌رتێ په‌روه‌ردێ دایه وه‌كو هه‌ر كه‌رته‌كێ دى و نوكه قوتابخانه‌كا 12 رێزى ب گوژمێ ملیاره‌ك و 178 ملیۆن دیناران ل تاخێ ئامێدیا نوى ل سه‌نته‌رێ ده‌ڤه‌رداریێ دهێته ئاڤاكرن و 40% كار د چێكرنا ڤێ قوتابخانێ دا ب دووماهى هاتیه، د هه‌مان ده‌م دا قوتابخانه‌كا 18 رێزى ژى ب گوژمێ نێزیكى ملیاره‌ك و 900 ملیۆن دیناران ل كۆمه‌لگه‌ها سیریێ یا سه‌ر ب ناحیا شێلادزێ ڤه دهێته ئاڤاكرن.
ناڤهاتى ئاماژه دا وێ چه‌ندێ كو ژ بلى ئاڤاكرنا قوتابخانان نووژه‌نكرنا قوتابخانان ژى ل سنوورێ قه‌زا ئامێدیێ یا به‌رده‌وامه و د قووناغا بوورى دا 13 قوتابخانه ب گوژمێ نێزیكێ 300 ملیۆن دیناران هاتبوونه نووژه‌نكرن و نوكه ژى پێنج قوتابخانێن دى ل سنوورێ هه‌مان قه‌زا دهێنه نووژه‌نكرن.
رێوار محه‌مه‌د ره‌شید
