شێرکۆ حەبیب: KDP ڕاستگۆیانە، پیشەییانە و بابەتیانە کار دەکات
میسر-KDP.info- بەرپرسی مەکتەبی پارتی دیموکراتی کوردستان لە میسر، لە پەیامێکدا دەڵێ، ماڵپەڕی KDP.info ڕاستگۆیانە، پیشەییانە و بابەتیانە کار دەکات و توانیویەتی ببێتە سەرچاوەیەکی گرنگی هەواڵ.
دەقی پەیامەکە:
بەڕێز بەڕێوەبەری ماڵپەڕی فەرمیی پارتی دیموكراتی كوردستان KDP.info
بەڕێزان سەرجەم كارمەند و ستافی ماڵپەڕی پارتی
بە بۆنەی 12یەمین ساڵیادی دامەزراندنی ماڵپەڕی فەرمیی پارتی دیموكراتی كوردستان، گەرمترین و جوانترین پیرۆزبایی لە یەكە بەیەكەی ئێوەی بەڕێز دەكەم و هیوای هەردەم سەركەوتن و پێشكەوتنتان بۆ دەخوازم.
لە ماوەی ئەم 12 ساڵەدا، ئەو ڕاستییە بۆ هەموو لایەك دەركەوت كەوا ئەو ماڵپەڕە توانی بە شێوازێكی ڕاستگۆیانە و پیشەیی و بابەتیانە درێژە بە كارەكانی بدات و ببێتە سەرچاوەیەكی گرنگی هەواڵ، بێگومان ئەم شێوازەی كاركردن سەرچاوە لە دڵسۆزیی كارمەندان و پابەندبوونیان بە ڕێبازی جەنابی بارزانیی نەمر و ڕێنماییەكانی پارتیمان وەردەگرێت، كە هەردەم پارتی لە خزمەت گەل و نیشتماندایە، هەروەها ئەو ئاستەی ئێستای ئەو ماڵپەڕە بە كەسانی شارەزا و دڵسۆز ئەنجام دەدرێت، كە شەونخونی دەكەن بۆ گەیاندنی هەواڵی ڕاست و دروست.
دووبارە پیرۆزبایی و هیوای هەردەم سەركەوتن و زیاتر بەرەوپێشچوون.
شێركۆ حەبیب
بەرپرسی مەكتەبی پارتی لە وڵاتی میسر
