رۆژا جیهانى یا زمانێ دایكێ ل دهۆكێ دهێته‌ ساخكرن

دهۆك–KDP.info- رۆژا جیهانى یا زمانێ دایكێ ئه‌ڤرۆ رۆژا سێشه‌مبى 21/2/2023 ب ئه‌نجامدانا دیداره‌كێ، ب ئاماده‌بوونا (د.عه‌لى ته‌ته‌ر) پارێزگارێ دهۆكێ ڤه‌ و چه‌ندین مامۆستایێن زانكۆیى و رۆشنبیر و كه‌سایه‌تیێن ده‌ڤه‌رێ ژ لایێ هه‌ر ئێك ژ زانكۆیا نه‌ورۆز و جیهان و زاخۆ و  ئێكه‌تیا نڤیسه‌رێن كورد تایێ دهۆكێ و رێڤه‌به‌ریا گشتى یا رۆشنبیرى و هونه‌رى ل دهۆكێ و وه‌قفا مه‌زۆپۆتامیایێ ل باكوورێ كوردستانێ و سازیا زمانى ل رۆژئاڤایێ كوردستانێ ڤه‌ ل هۆلێن زانكۆیا نه‌ورۆز و ئێكه‌تیا ناڤهاتى دهێته‌ ساخكرن.

فه‌رسه‌ت ره‌زیكى، به‌رپرسێ ڕاگه‌هاندنێ ل زانكۆیا نه‌ورۆز بۆ ماڵپه‌رێ فه‌رمیێ پارتى دیموكراتى كوردستان دیار كر كو بۆ جارا ئێكێ یه‌ رۆژا جیهانى یا زمانێ دایكێ ب كۆمڤه‌كرنا سازیێن په‌یوه‌ندیدارێن زمانى یێن حكومى و نه‌حكومى و كه‌سێن بسپۆر و ئه‌كادیمى د بوارێ زمانى دا ل پارێزگه‌ها دهۆكێ دهێته‌ ساخكرن و گۆت: "ب ڤێ هه‌لكه‌فتێ ئه‌ڤرۆ د ڤێ دیدارێ دا دێ چه‌ندین پانێل ل سپێدێ و ئێڤارى هێنه‌ ئه‌نجامدان و ده‌رئه‌نجامێن  ڤان پانێلان و دانوستاندنا دهێته‌كرن دێ ب ڕاپۆرت بۆ وه‌زاره‌تا خواندنا بلند و ڤه‌كۆلینێن زنستى یا حكومه‌تا هه‌رێما كوردستانێ  و سازیێن دى یێن په‌یوه‌ندیدار ب زامانى ڤه‌ هێته‌كرن بۆ وێ چه‌ندێ مفا ژێ بهێته‌ وه‌رگرتن".

ناڤهاتى ئاماژه‌ دا وێ چه‌ندێ كو ئه‌و وه‌كو سازیه‌كا ئه‌كادیمى به‌رده‌وام ئاریشه‌ و چاره‌سه‌ریا وان ئاریشان ب شێوه‌یه‌كێ ئه‌كادیمى ده‌ستنیشان دكه‌ن و بۆ بجهئینانێ ره‌وه‌نه‌یى جهێن په‌یوه‌ندیدار دكه‌ن.

 

رێوار محه‌مه‌د ره‌شید