مه‌زنترین دیدارا لاوان ل سه‌ر ئاستێ هه‌رێما كوردستانێ دێ هێته ئه‌نجامدان
دهۆك–KDP.info- سكرتێرێ ئێكه‌تیا لاوێن دیموكراتا كوردستانێ دیار كر كو هه‌مى به‌رهه‌ڤى بۆ رۆژا 18ى شوباتێ سال رۆژا دامه‌زراندنا ئێكه‌تیا لاوێن دیموكراتا كوردستانێ هاتینه‌كرن و ب ڤێ هه‌لكه‌فتێ دێ مه‌زنترین دیدارا لاوان ل سه‌ر ئاستێ هه‌رێما كوردستانێ ل پارێزگه‌ها دهۆكێ هێته ئه‌نجامدان.
مه‌یسه‌ر عوبه‌ید نهێلى، سكرتێرێ ئێكه‌تیا لاوێن دیموكراتا كوردستانێ بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو ب هه‌لكه‌فتا 70 سالیا دامه‌زراندنا ئێكه‌تیا لاوێن دیموكراتا كوردستانێ وه‌كو هه‌ر سال وان به‌رهه‌ڤیێن باش بۆ ساخكرنا ڤێ رۆژێ كرینه و ب هه‌مان هه‌لكه‌فت د پلان دایه مه‌زنترین دیدارا لاوان ب پشكداریا 800 كچ و كورێن سه‌رانسه‌رى هه‌رێما كوردستانێ ل پارێزگه‌ها دهۆكێ بهێته ئه‌نجامدان بۆ ڤێ مه‌ره‌مێ ژى لیژنه‌كا زانستى بۆ ده‌ستنیشانكرنا ئاریشێن لاوان ل هه‌رێما كوردستانێ هاتیه پێكئینان بۆ وێ چه‌ندێ دانوستاندن ل سه‌ر وان ئاریشان بهێته‌كرن و راده‌ستى جهێن په‌یوه‌ندیدار بهێنه‌كرن ژ بلى ڤێ چه‌ندێ د ڤێ دیدارێ دا دێ پانێله‌كێ هه‌ر سێ سه‌رۆكاتیێن هه‌رێما كوردستانێ ژى هه‌بیت و چه‌ندین بڕگێن دى ژى دێ د ناڤ ڤێ دیدارێ دا هێنه پێشكێشكرن، سه‌ره‌رایى ڤێ چه‌ندێ ب هه‌مان هه‌لكه‌فت كار و چالاكیێن جودا ژ پێشكێشكرنا پانێلان و ڤه‌كرنا وورك شوپ و خۆلان د بوارێن جودادا بۆ ده‌مێ سێ هه‌یڤان دێ ل سه‌رانسه‌رى هه‌رێما كوردستانێ د به‌رده‌وام بن، هه‌ر د چارچۆڤێ وى به‌رنامه‌ى دا یێ بۆ ساخكرنا ڤێ رۆژێ هاتیه دانان ل رۆژا 18ى شوباتێ دێ پێشۆازى ل مێهڤانان ژى هێته‌كرن و گۆت: "دڤێت ئه‌م وه‌كو لاو سه‌رده‌مانه هزر و كاران بكه‌ین و بۆ حكومه‌تێ پێشكێش بكه‌ین بۆ وێ چه‌ندێ به‌ره‌بابێ دووڤ مه دا باشتر ل ڤى وه‌لاتى بژیت".
ناڤهاتى ئاماژه دا وێ چه‌ندێ كو د به‌رنامێ وان یێ ساخكرنا رۆژا 18ى شوباتێ دا بوو كو چه‌ندین كۆنسێرتێن هونه‌رى ل سه‌رانسه‌رى هه‌رێما كوردستانێ بهێنه گێڕان كو مه‌زنترین كۆنسێرت ژى دا ل هه‌ولێرا پایته‌خت بیت، به‌لێ وه‌كو رێزگرتن بۆ قوربانیێن كاره‌ساتا ئه‌رد هه‌ژا ل باكوور و رۆژئاڤایێ كوردستانێ په‌یدابووى هه‌مى بڕگێن هونه‌رى ژ لایێ وان ڤه هاتنه ڕاگرتن و بتنێ دێ كار و چالاكیێن دى د بوارێن ئاماژه پێ هاتیه‌كرن د به‌رده‌وام بن.
رێوار محه‌مه‌د ره‌شید
