مەریوان دزەیی: لە چەند ڕۆژی داھاتوو شاندی ھەرێم دەگەڕێتەوە بەغدا

بەغدا -KDP.info- جێگری سەرۆکی فراکسیۆنی پارتی لە پەرلەمانی عێراق ئاشکرای کرد، لەسەر بابەتی بودجە و یاسا و نەوت و غاز و دادگای فیدراڵی ڕێککەوتنی سیاسی کراوە و دەشڵێ، لە چەند ڕۆژی داھاتوو شاندی دانوستانکاری ھەرێم دەگەڕێتەوە بەغدا.

مەریوان دزەیی، جێگری سەرۆکی فراکسیۆنی پارتی لە پەرلەمانی عێراق، بە ماڵپەڕی فەرمیی پارتی دیموکراتی کوردستانی ڕاگەیاند: "یەکەم جارە ڕێککەوتنێکی سیاسی بکرێت و لەنێو پەرلەماندا دەنگی لەسەر بدرێت، ئێمە دەستکەوتی زۆرمان ھەبووە لە بەغدا و لەسەر پرسی یاسای نەوت و غاز و دادگای فیدراڵی و بودجە ڕێککەوتن لە نێوان ھەرێمی کوردستان و بەغدا کراوە، پێویستە لە کاتی دیاریکراودا ئەو خاڵانەی ڕێککەوتنیان لەسەر کراوە جێبەجێ بکرێن.''

جێگری سەرۆکی فراکسیۆنی پارتی گوتی: "بڕیارە لە ئایندەیەکی نزیکدا شاندی دانوستانکاری ھەرێمی کوردستان بگەڕێتەوە بەغدا و لەسەر ئەو پرسانەی پێویستن دەست بە دانوستان بکرێت و لە چەند ڕۆژی داھاتوودا شاندەکە دەگاتەوە بەغدا و دانوستانەکان بەردەوام دەبن.''

مەریوان دزەیی ڕوونی کردەوە: "ئەو خاڵانەی ڕێککەوتنیان لەسەر کراوە و لەنێو کارنامەی حکوومەتی عێرقدا ھاتوون، ئێمە وەک پەرلەمانتاران و حکوومەتی ھەرێمیش لای خۆیەوە چاودێری ڕەوشەکە دەکەین بۆ ئەوەی بزانین چەندی لەو ڕێککەوتنە جێبەجێ دەکرێت، لەبەر ئەوەی لەسەر بنەمای ئەو ڕێککەوتنە سیاسییە ئێمە بەشداریمان لە حکوومەتی عێراقدا کردووە.''

قائید میرۆ