ئەڤ سالە 30 بیرێن ئاڤێ ل ئاکرێ دێ هێنە کۆلان
دهۆک-KDP.info- پەیڤدارێ رێڤەبەریا ئاڤا ئاکرێ دیار کر کو د پلان دایە ئەڤ سالە 30 بیرێن ئاڤێ ل سنوورێ قەزا ئاکرێ یا سەر ب پارێزگەها دهۆکێ ڤە بهێنە کۆلان و نوکە رەزامەندی ل سەر کۆلانا 18 بیران هاتیەکرن.
عەزو عەزو، پەیڤدارێ رێڤەبەریا ئاڤا ئاکرێ بۆ ماڵپەرێ فەرمیێ پارتی دیموکراتی کوردستان ئاشکرا کر کو ژ پێخەمەت خزمەتکرنا وەلاتیێن قەزا ئاکرێ د پلان دایە د سالا 2023ێ دا 30 بیرێن ئاڤێ بهێنە کۆلان و هەتا نوکە رەزامەندی ل سەر کۆلانا 18 بیران هاتیە کرن کو بەهرا پتریا ڤان بیران دێ ل سنوورێ دەڤەرا بجیل هێنە کۆلان و گۆت: "ب کۆلانا ڤان بیران هەتا ڕادەیەکی دێ ئاریشا کێم ئاڤیێ ل دەڤەرێ هێتە چارەسەرکرن، بەلێ ئەم پێدڤی ب کۆلانا ژمارەکا دی یا بیراینە یان ژی پرۆژێ ئاڤا ئاکرێ ب دووماهی بهێت بۆ وێ چەندێ ئاریشا کێمیا ئاڤێ ب ئێکجاری چارەسەر ببیت".
ناڤهاتی ئاماژە دا وێ چەندێ کو ئەڤ بیرێن ئاڤێ یێن کو دهێنە کۆلان ئاڤا وان بتنێ دێ بۆ ڤەخوارنێ هێتە بکارئینان و ب چو شێوەیان نابیت بۆ مەرەمێن چاندنێ بهێنە بکارئینان و گۆت: "ئەڤ بیرێن کو ب شێوەیێ تەندەر دهێنە کۆلان سەرپەرشتیا کارێ وان ژ لایێ رێڤەبەریا ئاڤا ئاکرێ ڤە دهێتەکرن، ئەڤە ددەمەکی دایە ئاریشێن کێمیا ئاڤێ د وەرزێ هاڤینێ دا پتر لێ دهێن".
رێوار محەمەد رەشید
