رێککەفتننامەکا لێکتێگەهشتنێ د ناڤبەرا زانکۆیا دهۆک و کۆنسلخانا گشتی یا ئەمریکا دا هاتە ئیمزاکرن

دهۆک -KDP.info- ب مەرەما هەماهەنگیەکا زێدەتر د کاری دا و ب هێزکرنا پەیوەندیان ژ هەموو ئالیەکی ڤە دناڤبەرا زانکۆیا دهۆک و ویلایەتێن ئێکگرتیێن ئەمریکی دا ئەڤرۆ رۆژا دووشەمبی 6/2/2023 رێککەفتننامەکا لێکتێگەهشتنێ د ناڤبەرا زانکۆیا دهۆک و کۆنسلخانا گشتی یا وەلاتێ ئەمریکا ل هەولێرا پایتەخت دا هاتە ئیمزاکرن.

د.داود سلێمان ئەترووشی، سەرۆکێ زانکۆیا دهۆک دیار کر کو پشتی ئەڤرۆ ئیرڤین هیکس جۆنیور کۆنسلێ گشتیێ ئەمریکا ل هەولێرا پایتەخت سەرەدانا زانکۆیا دهۆک کری و سمینارەک ب ئامادەبوونا مامۆستا و قوتابیێن زانکۆیێ ب ناڤێ (ژیان و میراتێ چالاکڤانێ ئەمریکیێ مافێن مرۆڤن د. مارتن لۆتەر کینگ جۆنیور) پێشکێشکری، د رێورەسمەکی دا 
رێککەفتننامەکا لێکتێگەهشتنێ د ناڤبەرا زانکۆیا دهۆک و کۆنسلخانا گشتی یا وەلاتێ ئەمریکا ل هەولێرا پایتەخت دا هاتە ئیمزاکرن.

ناڤهاتی ئاماژە دا وێ چەندێ کو بەری ئیمزاکرنا ڤێ رێککەڤتننامێ ژی، هەڤکاری و هەماهەنگیەکا باش د ناڤبەرا زانکۆیا دهۆک و ویلایەتێن ئێکگرتیێن ئەمریکی دا هەبوویە و ژ دەرئەنجامێ ڤان پەیوەندیان، بەری 17 سالان ئانکو ل سالا ٢٠٠٦ێ سەنتەرەکێ ئەمریکی ب ناڤێ (کوژیێ ئەمریکی) ل زانکۆیا دهۆک هاتیە دامەزراندن و د بوارێن جودا دا خزمەتان پێشکێشی قوتابیێن زانکۆیا دهۆک و وەلاتیێن پارێزگەهێ دکەت.
ژ ئالیێ خوە ڤە ئیرڤین هیکس جۆنیور کۆنسلێ گشتیێ ئەمریکا ل هەولێرا پایتەخت خوەشحالیا خوە ب ئیمزاکرنا ڤێ رێککەفتنێ دیار کر بۆ درێژەپێدانێ ب کۆژیێ ئەمریکی ل زانکۆیا دهۆک و خواست کو هەر کەسێ هەتا نوکە سەرەدانا کوژیێ ناڤهاتی نەکری دخوازین سەرەدانێ بکەت و مفایی ژ خزمەتێن ڤی کوژی د بوارێن جوداجودا دا وەرگریت.
رێوار محەمەد رەشید