ئه‌ڤرۆ لقه‌كێ به‌نكا بازرگانى یا عیراقى ل دهۆكێ هاته‌ ڤه‌كرن

دهۆك–KDP.info- د رێوره‌سمه‌كى دا ئه‌ڤرۆ رۆژا ئێكشه‌مبى لقه‌كێ به‌نكا بازرگانى یا عیراقى ب ئاماده‌بوونا عه‌لى ته‌ته‌ر، پارێزگارێ دهۆكێ و بیلال ئه‌لحه‌مه‌دانى، سه‌رۆكێ بانكا ناڤهاتى و ژماره‌كا په‌رله‌مانتار و بازرگان و وه‌به‌رهێنه‌ران ل دهۆكێ هاته‌ ڤه‌كرن.

پ.د.عه‌لى ته‌ته‌ر، پارێزگارێ دهۆكێ كو ب نوونه‌راتیا سه‌رۆكێ حكومه‌تا هه‌رێما كوردستانێ پشكدارى د رێوره‌سمێن ڤه‌كرنا لقێ به‌نكا بازرگانى یا عیراقى ل پارێزگه‌ها دهۆكێ دا كربوو دیار كر كو به‌نكا بازرگانى یا عیراقى دگه‌ل به‌نكێن دى گرنگیا خوه‌ هه‌یه‌ د كه‌رتێ به‌نكى و دارایى یێ هه‌رێما كوردستانێ و عیراقێ و ده‌ڤه‌رێ دا دگه‌ل ڤێ پێشڤه‌چوونا په‌یوه‌ندیێن ئابوورى و دارایى یێن جیهانى كا گرنگیا ڤان به‌نكان چه‌نده‌، ئێك ژ بزاڤێن به‌رده‌وامێن كابینا نه‌هێ یا حكومه‌تا هه‌رێما كوردستانێ و ل به‌ر روشناییا سیاسه‌تا سه‌رۆكێ حكومه‌تا هه‌رێما كوردسستانێ و په‌یوه‌ندیێن به‌رده‌وامێن دگه‌ل به‌نكا ناڤه‌ندى یا عیراقى بۆ ڤه‌كرنا به‌نكا نیشتیمانى یا كوردستانى یه‌ بۆ وێ چه‌ندێ ببیته‌ رێكخه‌ر بۆ هه‌مى دامه‌زراوێن گشتى یێن دارایى و رێكخستنا وێ ل هه‌رێما كوردستانێ و چارچۆڤێ عیراقێ و ده‌ڤه‌رێ دا.

پارێزگارێ دهۆكێ گۆت: "ئێك ژ بزاڤێن كابینا نه‌هێ یا حكومه‌تا هه‌رێما كوردستانێ دگه‌ل حكومه‌تا عیراقێ ئه‌وه‌ ئه‌م چه‌وا په‌ره‌پێدانێ پتر ب كارێ به‌نكى و یێ دارایى بكه‌ین و ب چ شێوه‌ پتر گرنگیێ ب لقێن به‌نكى یێن عیراقى یان ژى یێن تایبه‌ت ل هه‌رێما كوردستانێ بده‌ین و ژێرخانێ بۆ چێكه‌ین بۆ وێ چه‌ندێ ب شێوه‌یه‌كێ باشتر و كاریگه‌رتر خزمه‌تا وه‌لاتیێن هه‌رێما كوردستانێ بۆ كارێ بازرگانى و به‌نكى بكه‌ین و هه‌روه‌سا ئاریشێن وان یێن دارایى چاره‌سه‌ر بكه‌ین و ئالوگۆرا بازرگانى ئاسانتر لێ بكه‌ین".

 

رێوار محه‌مه‌د ره‌شید