پرۆژێ ئاڤا ڤه‌خوارنێ ل دێره‌لۆكێ هاته ڤه‌كرن
دهۆك –KDP.info- د رێوره‌سمه‌كى پرۆژێ ستراتیژى یێ ئاڤا دێره‌لۆكێ ل سنوورێ قه‌زا ئامێدیێ یا سه‌ر ب پارێزگه‌ها دهۆكێ ڤه ئه‌ڤرۆ رۆژا چارشه‌مبى 1/2/2023 ب ئاماده‌بوونا پ.د.عه‌لى ته‌ته‌ر، پارێزگارێ دهۆكێ و ساسان عه‌ونى، وه‌زیرێ شاره‌وانى و گه‌شتوگۆزار ل هه‌رێما كوردستانێ و كلاوس شترایشه‌ر، قۆنسلێ گشتى یێ وه‌لاتێ ئه‌لمانیا ل هه‌رێما كوردستانێ هاته ڤه‌كرن كو پترى 150 هزار كه‌سان دێ ژ ڤى پرۆژه‌یى مفاداربن.
پ.د.عه‌لى ته‌ته‌ر، پارێزگارێ دهۆكێ د رێوره‌سمێن ڤه‌كرنا پرۆژێ ستراتیژى یێ ئاڤا دێره‌لۆكێ ل سنوورێ قه‌زا ئامێدیێ دیار كر كو پرۆژێ ستراتیژى یێ ئاڤا ڤه‌خوارنێ ژ لایێ حكومه‌تا هه‌رێما كوردستانێ ڤه بۆ خه‌لكێ قه‌زا ئامێدیێ هاتبوو بجهئینان و هه‌تا نوكه حكومه‌تا هه‌رێمێ نێزیكى 100 ملیۆن دۆلاران لێ مه‌زاختینه و جهێ خوه‌شحالیێ یه كو نوكه ئه‌ڤ پرۆژه یێ كه‌فتیه د كارى دا و ئاڤا ڤه‌خوارنێ بۆ چه‌ندین ناحیێن ب سه‌ر قه‌زا ئامێدیێ دابینكریه، به‌لێ پشتى ئه‌ڤ پرۆژه كه‌فتیه كارى هنده ئاریشه په‌یدابوون ل دۆر بابه‌تێ شێلیبوونا ئاڤێ و ژ به‌ر ڤێ چه‌ندێ ژى بۆ ده‌مێ چه‌ند رۆژان خه‌لكێ مه د ما بێ ئاڤ، ئه‌ڤه دده‌مه‌كى دایه حكومه‌تا هه‌رێما كوردستانێ چه‌ندین جاران بزاڤ كرن ڤى بابه‌تى چاره‌سه‌ر بكه‌ت، به‌لێ پشتى پرۆژێ هایدروپاوه‌رێ ئاڤا دێره‌لۆكێ هاتیه بجهئینان بۆ وێ چه‌ندێ ئه‌ڤ ئاڤه ب هه‌روه نه‌چیت و بزاڤا كۆنترۆلا شێلیبوونا ئاڤێ بهێته‌كرن داكو وه‌لاتیێن ڤێ ده‌ڤه‌رێ بێ ئاڤ نه‌مینن، ئه‌ڤ پرۆژێ نوى یێ ئاڤێ یێ كو ئه‌ڤرۆ هاتیه ڤه‌كرن ژ لایێ وه‌زاره‌تا شاره‌وانى و گه‌شتوگۆزار یا حكومه‌تا هه‌رێما كوردستانێ ب هه‌ڤپشكى دگه‌ل حكومه‌تا فیدڕال یا ئه‌لمانیا هاته بجهئینان و گۆت: "پرۆژێن ئاڤه‌دانى و خزمه‌تگۆزارى ل ده‌ڤه‌را ئامێدیێ دبه‌رده‌وامن، ل رۆژێن بورى ژماره‌كا پرۆژان ل ڤێ ده‌ڤه‌رێ كه‌فتینه د بوارێ بجهئینانێ دا و ژڤانه ل رۆژێن داهاتى ژى سه‌ره‌دانا هه‌مان ده‌ڤه‌ر بكه‌ین و به‌رێ بنیاتى بۆ ژماره‌كا دى یا پرۆژێن خزمه‌تگۆزارى بدانین".
ژ ئالیێ خوه‌ڤه ساسان عه‌ونى، وه‌زیرێ شاره‌وانى و گه‌شتوگۆزار ل هه‌رێما كوردستانێ ئاشكرا كر كو پترى 150 هزار كه‌سان ژ ئاكنجیێن ده‌ڤه‌را ئامێدیێ دێ مفایى ژ ڤى پرۆژه‌ى وه‌رگرن كو گوژمێ هاتیه خه‌ملاندن بۆ بجهئینانا ڤى پرۆژه‌ى 1.1 ملیار دینارن ئه‌ڤه دده‌مه‌كى دایه گوژمێ نێزیكى 200 ملیۆن دیناران ل سه‌ر بۆدجا حكومه‌تا هه‌رێما كوردستانێ و 600 هزار دۆلار ژى ژ لایێ رێكخراوا یونیسیڤ ڤه بۆ بجهئینانا ڤى پرۆژه‌یى هاتبوونه ته‌رخانكرن و گۆت: "ئه‌ڤى پرۆژه‌ى شیانێن ڤه‌گوهاستنا دوو هزار و 700 مه‌ترێن سێجا یێن ئاڤێ د ده‌مژمێره‌كێ دا ب بووریا كاربوون ستیل ب درێژاهیا هزار و 240 مه‌تر ب تیره‌یا 900 ملیمه‌تر بۆ وێستگه‌ها ڤاڤارتنا ئاڤا ئامێدیێ هه‌نه".
رێوار محه‌مه‌د ره‌شید
