ده‌ست ب به‌لاڤكرنا 600 هزار لترێن گازا سپى ل دهۆكێ و زاخۆ هاته‌كرن
دهۆك–KDP.info- ب مه‌ره‌ما پاراستنا خه‌لكێ كێم ده‌رامه‌ت و خودان پێدڤیێن تایبه‌ت ل ده‌ڤه‌رێن جوداجودا یێن هه‌رێما كوردستانێ ژ سه‌رمایا زڤستانێ و پاراستنا ژینگه‌هێ ژ بڕینا داران ئه‌ڤرۆ رۆژا سێشه‌مبى 31/1/2023 ده‌زگه‌هێ خێرخوازى یێ بارزانى ده‌ست ب به‌لاڤكرنا 600 هزار لترێن گازا سپى ل ده‌ڤه‌رێن جوداجودا یێن پارێزگه‌ها دهۆكێ و ئیدارا سه‌ربه‌خۆ یا زاخۆ كر.
عه‌بدولواحد ئه‌مین ئه‌ترووشى، به‌رپرسێ ئوفیسا دهۆك و ئه‌ندامێ ده‌سته‌یا كارگێریا ده‌زگه‌هێ خێرخوازى یێ بارزانى بۆ مالپه‌رێ فه‌رمیێ پارتى دیموكراتى كوردستان دیار كر كو پرۆژێ به‌لاڤكرنا دوو ملیۆن لترێن گازا سپى ل سه‌رانسه‌رى هه‌رێما كوردستانێ ژ لایێ ده‌زگه‌هێ خێرخوازى یێ بارزانى ڤه هاتیه ڕاگه‌هاندن و د چارچۆڤێ ڤى پرۆژه‌ى دا ئه‌ڤرۆ ده‌زگه‌هێ ناڤهاتى ده‌ست ب به‌لاڤكرنا 600 هزار لترێن گازا سپى ل سه‌نته‌رێ باژێرێ دهۆكێ و قه‌زایێن (ئاكرێ، شێخان، ئامێدیێ، به‌رده‌ره‌ش) و ئیدارا سه‌ربه‌خۆ یا زاخۆ كر و گۆت: "شه‌ش هزار خێزانێن پارێزگه‌ها دهۆكێ و ئیدارا سه‌ربه‌خۆ یا زاخۆ دێ ژ ڤى پرۆژه‌ى د مفادار بن، ئه‌ڤه دده‌مه‌كى دایه كو ئه‌ڤ گازه بێ به‌رامبه‌ر ل سه‌ر خه‌لكێ كێم ده‌رامه‌ت و خودان پێدڤیێن تایبه‌ت دهێته به‌لاڤكرن و ئه‌ڤ هه‌وه دێ بۆ ده‌مێ 11 رۆژێن دى یا به‌رده‌وام بیت".
ناڤهاتى ئاماژه دا وێ چه‌ندێ كو هه‌كه پشته‌ڤانیا ده‌زگه‌هێ خێرخوازى یێ بارزانى ڤه ژ لایێ خێرخواز و كۆمپانیان ڤه بهێته‌كرن ئه‌و دێ شێن ڤى پرۆژێ خوه به‌رفره‌هتر لێ كه‌ن و زوورترین رێژا خه‌لكێ كێم ده‌رامه‌ت و خودان پێدڤیێن تایبه‌ت ل سه‌رانسه‌رى هه‌رێما كوردستانێ دێ ژێ مفاداربن.
رێوار محه‌مه‌د ره‌شید
