سه‌نته‌ره‌ك بۆ پێگه‌هاندنا خودان پێدڤیێن تایبه‌ت ل دهۆكێ هاته ڤه‌كرن
دهۆك-KDP.info- د رێوره‌سمه‌كى دا ئه‌ڤرۆ رۆژا سێشه‌مبى 31/1/2023 پ.د.عه‌لى ته‌ته‌ر پارێزگارێ دهۆكێ و كوێستان محه‌مه‌د، وه‌زیرا كار و كاروبارێن كومه‌لایه‌تى ل هه‌رێما كوردستانێ و قۆنسلێ گشتى یێ وه‌لاتێ ئه‌لمانیا ل هه‌رێما كوردستانێ سه‌نته‌ره‌ك بۆ پێگه‌هاندنا خودان پێدڤیێن تایبه‌ت ب پشته‌ڤانیا رێكخراواGIZ ل باژێرێ دهۆكێ ڤه‌كر.
پ.د.عه‌لى ته‌ته‌ر پارێزگارێ دهۆكێ گۆت: "خوه‌شحالین ئه‌ڤرۆ جاره‌كا دى ل پارێزگه‌ها دهۆكێ بۆ كاره‌كێ دى یێ مه‌زن یێ مرۆڤایه‌تى دگه‌ل دوستێن خوه یێن ئێكه‌تیا ئورۆپا ب تایبه‌ت وه‌لاتێ دوست و خوه‌شتڤى وه‌لاتێ ئه‌لمانیا و رێكخراواGIZ ڤى سه‌نته‌رى ڤه‌كه‌ین كو ئه‌ڤه نه كارێ وان یێ ئیكێ یه ل پارێزگه‌ها دهۆكێ ئه‌نجامدده‌ن و ئه‌م پشتراستین ژى نابیته كارێ وان یێ دووماهیێ ژى كو به‌رى نوكه ژى وه‌لات و رێكخراوا ناڤهاتى چه‌ندین پرۆژێن ب ڤى شێوه‌یى ب پشته‌ڤانیا به‌رده‌واما حكومه‌تا هه‌رێما كوردستانێ ل باژێر و باژارۆكێن هه‌رێما كوردستانێ ب شێوه‌یه‌كێ گشتى و ل ده‌ڤه‌رێن كوردستانى یێن ژ ده‌رڤه‌ى ئیدارا حكومه‌تا هه‌رێما كوردستانێ ئه‌نجامداینه، ئه‌ڤه دده‌مه‌كى دایه مه ژینگه‌هه‌كا ساخله‌م و پێشكه‌فتى و دیموكرات و خوه دگه‌ل كاودانێن جیهانى دا بگونجینیت دڤێت، ئه‌ڤ ژینگه‌هه ژى پێكدهێت ژ وێ ژینگه‌ها نوكه ئه‌م تێدا دژین و ئه‌و مرۆڤێن د ناڤ وێ ژینگه‌هێ دا دژین، ژ به‌ر ڤێ چه‌ندێ ژى دڤێت خودان پێدڤیێن تایبه‌ت ژى د ناڤ ڤى جڤاكى دا خوه دگه‌ل مه هه‌ر ئێك د بوارێ خوه دا زێده‌تر ببینن".
كوێستان محه‌مه‌د، وه‌زیرا كار و كاروبارێن كومه‌لایه‌تى ل هه‌رێما كوردستانێ ئاشكرا كر كو سه‌نته‌رێن ب ڤى شێوه‌یى ل سه‌رانسه‌رى هه‌رێما كوردستانێ هه‌نه و ئه‌ڤرۆ ئه‌ڤ سه‌نته‌ره ل باژێرێ دهۆكێ ژى هاته ڤه‌كرن و زارۆیێن هه‌مى قه‌زایێن سه‌ر ب پارێزگه‌ها دهۆكێ ڤه ده‌مێ پشكدارى د وان خۆلێن جوراوجور دا دكه‌ن یێن كو ل ڤى سه‌نته‌رى دهێنه ڤه‌كرن دێ فێرى گه‌له‌ك كاران بن و ب ڤێ چه‌ندێ ژى دێ مفایه‌كێ مه‌زن گه‌هیننه گومه‌لگه‌هێ بشێوه‌یه‌كێ گشتى و گۆت: "ئه‌م وه‌كو وه‌زاره‌ت ژى پشته‌ڤانیێ ل هه‌ر پرۆژه‌یه‌كێ ب ڤى شێوه‌یى دكه‌ین كو بۆ به‌رژه‌وه‌ندیا گشتى و خزمه‌تكرنا ته‌خ و چینێن جوداجودا یێن جڤاكى بهێته ڤه‌كرن".
ژ ئالیێ خوه‌ڤه فرانك والتر كۆنسلێ گشتى یێ وه‌لاتێ ئه‌لمانیا ل هه‌رێما كوردستانێ خویا كر كو ئه‌ڤ په‌یمانگه‌هه دێ هاریكاریا كه‌سێن خودان پێدڤیێن تایبه‌ت كه‌ت كو فێرى هنده‌ك كاران ببن بۆ برێڤه‌به‌رنا ژیانا خوه یا رۆژانه، بتایبه‌تى جهه‌كێ وه‌كى پارێزگه‌ها دهۆكێ كو به‌هراپتر ئاواره و په‌نابه‌ر لێ هه‌نه و یا گرنگه ده‌لیڤێ بده‌نه ئاواره و په‌نابه‌رێن خودان پێدڤیێن تایبه‌ت فێرى تایبه‌تمه‌ندیان ببن بۆ پێشڤه‌برنا ئابوورێ وه‌لاتى.
رێوار محه‌مه‌د ره‌شید
