نێچیرڤان بارزانى له‌گه‌ڵ ئه‌ردۆغان كۆبووه‌وه
ئه‌مڕۆ پێنجشه‌ممه 2023/1/26، به‌ڕێز نێچیرڤان بارزانى، سه‌رۆكى هه‌رێمى كوردستان، به سه‌ردانێك گه‌یشته ئه‌نقه‌ره و له‌گه‌ڵ به‌ڕێز ڕه‌جه‌ب ته‌ییب ئه‌ردۆغان، سه‌ركۆمارى توركیا كۆبووه‌وه.
له كۆبوونه‌وه‌كه‌دا په‌یوه‌ندییه‌كانى عێراق و هه‌رێمى كوردستان له‌گه‌ڵ توركیا، دۆخى سیاسیى عێراق و هه‌رێمى كوردستان، به‌تایبه‌تى دواى ده‌ستبه‌كاربوونى كابینه‌ى نوێى حكوومه‌تى فیدراڵیى عێراق، په‌یوه‌ندییه‌كانى هه‌ولێر ـ به‌غدا و گفتوگۆى چاره‌سه‌ركردنى كێشه‌كانى نێوانیان و ده‌رفه‌ته‌كانى هاریكاریى عێراق و هه‌رێمى كوردستان له‌گه‌ڵ توركیا له بوارى وزه‌دا، تاوتوێ كران.
هه‌ردوولا جه‌ختیان له خواستى دوولایه‌نه بۆ بره‌ودان به په‌یوه‌ندییه‌كانى هه‌رێمى كوردستان و توركیا له هه‌موو بواره‌كاندا كرده‌وه، به‌تایبه‌تیش بوارى بازرگانى و ئابوورى و سوودوه‌رگرتن له‌و ده‌رفه‌تانه‌ى بۆ فراوانكردنى هاریكاریى هاوبه‌شى عێراق و هه‌رێمى كوردستان له‌گه‌ڵ توركیا له بوارى وزه‌دا هاتوونه‌ته ئاراوه كه ده‌كرێت ڕۆڵى كاراى هه‌بێت له پڕكردنه‌وه‌ى ئه‌و بۆشایى و پێویستییه‌ى ئه‌مڕۆ له جیهان و به‌تایبه‌تى له ئه‌ورووپا له بوارى وزه و گازى سروشتیدا دروست بووه.
گرنگیى پته‌وكردنى هاریكارى و هه‌ماهه‌نگیى عێراق و هه‌رێمى كوردستان له‌گه‌ڵ توركیا بۆ پاراستنى ئاسایشى سنوور، دوایین پێشهاته‌كانى شه‌ڕى دژى تیرۆر و مه‌ترسییه‌كانى داعش له عێراق و سووریا، دۆخى ناوچه‌كه به‌گشتى و چه‌ند پرسێكى دیكه‌ى جێی بایه‌خى هاوبه‌ش، ته‌وه‌رێكى دیكه‌ى كۆبوونه‌وه‌كه بوو.
