دۆزگوون کاپڵان بۆ KDP: سەرۆک بارزانی سەرۆکایەتیی خەتی خێر دەکات
باکووری کوردستان-KDP.info- دۆزگوون کاپڵان، سەرۆکی گشتیی ماف و ئازادیان (هاکپار) لە باکووری کوردستان، لە هەڤپەیڤینێکی تایبەتی ماڵپەڕی فەرمیی پارتی دیموکراتی کوردستاندا رایدەگەیەنێت، هەموو پارچەیەکی کوردستان تایبەتمەندیی خۆی هەیە لە هەموو ڕوویەکەوە و هەموو پارتەکانی ئەو پارچانە بەرپرسیارن لە هەموو کار و خەباتێکی سیاسی و ئابووری و شارستانی. دەشڵێ، ئێستا وڵاتان وەک دەوڵەت مەمەڵە لەگەڵ هەرێمی کوردستاندا دەکەن.
دۆزگوون کاپڵان ئاماژەی دا، ئێستا هەولێر ناوەندێکی سیاسی و دیپلۆماسییە بۆ هەموو جیهان و بە تایبەت بۆ کوردان، کە تایبەتمەندیی خۆی هەیە بۆ هەموو تاکێکی کورد لە هەموو جیهاندا و وڵاتانی جیهانیش وەک دەوڵەت هەڵسوکەوت لەگەڵ هەرێمدا دەکەن.
بۆچوونی سەرۆکی گشتیی ماف و ئازادیان (هاکپار) لە باکووری کوردستان ئەوەیە، ئێستا کورد بەسەر چوار وڵاتدا دابەش بوون، پارچەیەک ئازادە و ئەوانەی دیکەش ژێردەستن، ئێستا یەکێتیی کوردان لە ئارادا نییە، چونکە بە یەکێتی دەتوانین دەستکەوتەکانمان بپارێزین، دەبێت ئەو قەوارەیەی ئێستا کوردان هەیانە لە هەرێمی کوردستان، وەک بیلبیلەی چاوی خۆمان بپارێزین.
دەربارەی ڕۆڵی سەرۆک بارزانی لە ناوچەکەدا، کاپڵان گوتی: "سەرۆک بارزانی هەموو ژیان و کار و خەباتی خۆی بۆ کوردستان تەرخان کرد و ڕۆڵیکی گەورە و گرنگ دەبینێت، ئێستا دوو خەت لە کوردستان هەن، خەتی خێر و خەتی شەڕ، کە بێگومان سەرۆک بارزانی سەرۆکایەتیی خەتی خێر دەکات، ئێمە ڕۆڵی جەنابیان بە گەورە و گرنگ دەبینین لە پێناو پاراستنی دەستکەوتەکانی گەلی کورد، ئێستا بەرپرسیارێتییەکی گەورە لەسەر شانی سەرۆک بارزانییە".
دەشڵێ: "ئێستا هەرێمی کوردستان لەسەر ئاستی وڵاتان بە قەوارەیەکی گەورە و گرنگی ناوچەکە وەسف دەکرێت، دەبێت بۆ ئەمەش هەرێمی کوردستان ریفۆرم لە هەموو بوارەکانیدا بکات، لەوانەش یەکخستنی هێزەکانی پێشمەرگە، چونکە ئەمانە دەبنە نموونەی دیموکراسی و وڵاتێکی مۆدێرن، بەڕێوەبردن و پەرلەمان و دادگا نیشانەی جوانیی کۆمەڵگایەکی دیموکراتن و دەبێت هەرێمی کوردستان زیاتر گرنگییان پێ بدات".
کاروان باعەدری
