ب گوژمێ پترى 13 ملیار دیناران به‌رێ بنیاتى بۆ ژماره‌كا پرۆژان ل ئاكرێ هاته دانان
دهۆك-KDP.info-سكرتێرێ رۆژنامه‌ڤانى یێ پارێزگارێ دهۆكێ دیار كر كو پ.د.عه‌لى ته‌ته‌ر، پارێزگارێ دهۆكێ ئه‌ڤرۆ رۆژا دووشه‌مبى 23/1/2023 به‌رێ بنیاتى ب گوژمێ پترى 13 ملیار دیناران ل قه‌زا ئاكرێ یا سه‌ر ب پارێزگه‌ها دهۆكێ ڤه دانا، د هه‌مان ده‌م دا چار پرۆژێن نوى یێن خزمه‌تگۆزارى ژى ل هه‌مان قه‌زا هاتنه ڤه‌كرن.
ملله‌ت عسمه‌ت، سكرتێرێ رۆژنامه‌ڤانى یێ پارێزگارێ دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو پشتى ل رۆژێن بورى به‌رێ بنیاتى بۆ چه‌ندین پرۆژێن خزمه‌تگۆزارى ل ده‌ڤه‌رێن جوداجودا یێن پارێزگه‌ها دهۆكێ هاتیه دانان و چه‌ندین پرۆژێن نوى یێن خزمه‌تگۆزارى ژى هاتینه ڤه‌كرن و كه‌فتینه د خزمه‌تا وه‌لاتیان دا ئه‌ڤرۆ ژى پارێزگارێ دهۆكێ سه‌ره‌دانا قه‌زا ئاكرێ كر و ب گوژمێ 13 ملیار و 577 ملیۆن دیناران به‌رێ بنیاتى بۆ ژماره‌كا پرۆژێن نوى یێن خزمه‌تگۆزارى ل قه‌زا ناڤهاتى دانا و چار پرۆژێن نوى ژى ل هه‌مان قه‌زا ڤه‌كرن و گۆت: "ئه‌و پرۆژێن ئه‌ڤرۆ به‌رێ بنیاتى بۆ هاتیه دانان، پرۆژێ سه‌خبێریا رێیا دوریانا گرده‌سین – نییاووك، هه‌روه‌سا پرۆژێ چێكرنا رێیێن ناڤخۆ ل سه‌نته‌رێ ناحیا گرده‌سین، پرۆژێ سه‌خبێریا رێیا گوندێ گلینه و سه‌خبێریا رێیا زێلكه فه‌خرى – كوله‌كان، د هه‌مان ده‌م دا به‌رێ بنیاتى بۆ پرۆژێ ئاڤاكرنا قوتابخانه‌كا 12 پۆلى ل باكرمان و پرۆژێ تمامكرن و چێكرنا رێیا گوندێ باكرمان – بیلمه‌ند – كشكاوا ل سه‌نته‌رێ قه‌زا ئاكرێ و پرۆژێ نووژه‌نكرن و قێركرنا جادا گوندێ سمیلان و ڤه‌كوشتنگه‌ها ئاژه‌لى ل ئاكرێ هاته دانان".
ناڤهاتى خویا كر د چارچوڤێ وان پرۆژێن خزمه‌تگۆزارى دا یێن كو ئه‌ڤرۆ به‌رێ بنیاتى بۆ ژ لایێ پارێزگارێ دهۆكێ ڤه ل قه‌زا ئاكرێ هاتیه دانان، پرۆژێ سه‌خبێركرن و قێركرنا چه‌ندین جادێن ناڤخۆ ل تاخێن نوى یێن ئاكرێ و سه‌خبێركرن و كونكریتكرنا ژماره‌كا جادێن ناڤخۆ ل ئاكرێ، ڤه‌كرن و قێركرنا جادا قوتابخانا تاخێ ده‌واجن و قوتابخانا پیكه‌سه‌ر و كونكریتكرنا جادا تاخێ شه‌ڤیلكا، د هه‌مان ده‌م دا به‌رێ بنیاتى بۆ پرۆژێ ڤه‌كرن و تێكه‌لكرنا سایده‌كێ جادا به‌رامبه‌ر كۆلیژا په‌روه‌رده و سه‌خبێركرن و قێركرنا جادێن ده‌ڤه‌را كارگه‌هێت سڤك و چه‌ندین جادێن دى هاته دانان و گۆت: "پارێزگارێ دهۆكێ به‌رێ بنیاتى بۆ چێكرنا رێیا پارچه زه‌ڤیێن ل سه‌ر كه‌سوكارێن شه‌هیدێن شه‌رێ دژى تیرۆرستێن داعش هاتینه به‌لاڤكرن دانا، د هه‌مان ده‌م دا به‌رێ بنیاتى بۆ چێكرنا سولینێن چارگوشه ل تاخێ ئادارێ و سه‌خبێركرن و كونكریتكرنا جادا ل تاخێ ئالایێ ل پشت كارگه‌هێن كاشى و بلوكا و پرۆژێ چێكرنا به‌نداڤه‌كێ دگه‌ل دوو دیوارێن پالپشت ل تاخێ كانى زه‌ركێ دانا".
رێوار محه‌مه‌د ره‌شید
