- رێڤه‌به‌ریا پاسپۆرتان ل دهۆكێ ئامارێن سالا 2022 راگه‌هاندن
- ل سالا بورى پترى 101 هزار پاسپۆرتان ل دهۆكێ هاتینه ده‌ركرن
دهۆك –KDP.info- رێڤه‌به‌ریا پاسپۆرتان ل پارێزگه‌ها دهۆكێ ئامارێن خوه یێن سالا 2022 راگه‌هاندن كو ل سالا بورى پترى 101 هزار پاسپۆرتان ل نڤیسینگه‌ها پاسپۆرتان ل دهۆكێ و زاخۆ و ئاكرێ هاتینه ده‌ركرن.
رائیدێ مافپه‌روه‌ر سه‌عه‌د ئیسماعیل، به‌رپرسێ به‌شێ راگه‌هاندنێ ل رێڤه‌به‌ریا پاسپۆرتان ل پارێزگه‌ها دهۆكێ ئاشكرا كر كو ل سالا بورى 101 هزار و 491 پاسپۆرت ل پارێزگه‌ها دهۆكێ هاتینه ده‌ركرن ژ ڤى سه‌رجه‌مى 66 هزار و 234 پاسپۆرت ل نڤیسینگه‌ها پاسپۆرتێن دهۆكێ و 22 هزار و 373 پاسپۆرت ل نڤیسینگه‌ها پاسپۆرتێن زاخۆ و 12 هزار و 884 ل نڤیسینگه‌ها پاسپۆرتێن ئاكرێ هاتینه ده‌ركرن، هه‌روه‌سا د هه‌مان سال دا هزار و 754 پاسپورت هاتینه ژناڤبرن و به‌رزه‌كرن و گۆت: "سێ هزار و 150 پاسپۆرت ل رێڤه‌به‌ریا پاسپۆرتان ل پارێزگه‌ها دهۆكێ هاتینه چاپكرن، به‌لێ هه‌تا نوكه خودانێن وان سه‌ره‌دانا رێڤه‌به‌ریا مه نه‌كریه بۆ وه‌رگرتنا پاسپۆرتێن خوه".
ناڤهاتى ئاماژه دا وێ چه‌ندێ كو ئه‌ڤه ده‌مه‌كه ده‌ركرنا پاسپۆرتان گیرۆ دبیت، ژ ئه‌گه‌رێ نه‌هنارتنا رێژا پێدڤى ژ تێنوسێن پاسپۆرتان ژ لایێ رێڤه‌به‌ریا گشتى یا كاروبارێن پاسپۆرتان ل به‌غدا ڤه و ئه‌ڤ ئاریشه ل سه‌رانسه‌رى عیراقێ یا هه‌ى و گۆت: "هه‌تا نوكه چو نڤیسارێن فه‌رمى بۆ رێڤه‌به‌ریا مه ل دۆر ژڤانێ گوهۆڕینا پاسپۆرتان نه‌هاتینه، به‌لێ پلان هاتیه دانان كو پاسپۆرت بهێنه گوهۆڕین و كوالێتیا وان باشتر لێ بهێته‌كرن".
رێوار محه‌مه‌د ره‌شید
