بیره‌وه‌ریا دامه‌زراندنا كۆمارا كوردستان ل دهۆكێ هاته ساخكرن
دهۆك –KDP.info- بیره‌وه‌ریا 77 سالیا دامه‌زراندنا كۆمارا كوردستان (مهاباد) ئه‌ڤرۆ رۆژا ئێكشه‌مبى 22/1/2023 ژ لایێ مالا لاوان ل پارێزگه‌ها دهۆكێ یا سه‌ر ب ئێكه‌تیا لاوێن دیموكراتا كوردستانێ ڤه ل هۆلا سه‌نته‌رێ پێشمه‌رگه یێ ره‌وشه‌نبیرى هاته ساخكرن.
كاوار ره‌سول نێروه‌یى، به‌رپرسێ مالا لاوان ل پارێزگه‌ها دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو مالا لاوان ل پارێزگه‌ها دهۆكێ وه‌كو نه‌ریته‌كێ سالانه ئه‌ڤ ساله ژى بیره‌وه‌ریا دامه‌زراندنا كۆمارا كوردستان (مهاباد) ل ژێر درووشمێ (كۆمارا كوردستان، دیرۆك، ئه‌زمون، سیاسه‌ت) ب ئه‌نجامدانا په‌نه‌له‌كى ساخ كر كو د ڤى په‌نه‌لى دا (د.هۆگر تاهر) مامۆستایێ زانكۆیێ باس ل كاریگه‌رى و سه‌ربوورا كۆمارا كوردستان كر، هه‌روه‌سا د هه‌مان ده‌م دا (د.نزار گۆلى) مامۆستایێ زانكۆیێ باس ل ئه‌گه‌رێن نێده‌وله‌تى یێن ژناڤچوونا كۆمارا كوردستان كر.
ناڤهاتى ئاماژه دا وێ چه‌ندێ كو كۆمارا كوردستان وه‌كو وێسگه‌هه‌كا گرنگ و رۆژه‌كا زیندى و نه‌مره د مێژوویا بزاڤا رزگاریخوازا گه‌لێ كوردستانێ دا و گۆت: "مه‌ره‌ما مه ژ ساخكرنا ڤێ بیره‌وه‌ریێ ئه‌وه به‌ره‌بابێ نوى ژى ئاگه‌هدار ببیت و بزانیت ده‌ستكه‌فتێن ئه‌ڤرۆ و گه‌هشتنا هنده‌ك ئارمانجێن ئه‌ڤرۆ گه‌لێ كوردستانێ گه‌هشتیێ پێكڤه‌گرێدانه‌ك هه‌بوویه د هه‌مى بزاڤ و شۆره‌شێن جوداجودا یێن پارچێن دى یێن كوردستانێ دا كو ب ساناهى بده‌ستڤه نه‌هاتینه و ماندیبوون و قوربانیدان و ژناڤچوونه‌كا روحیێ بوویه، به‌لێ ئیرادا گه‌لێ كوردستانێ یا به‌رده‌وام بوو د ڤان بزاڤان دا، ژ به‌ر ڤێ چه‌ندێ ژى یا گرنگه به‌ره‌بابێ نوى ژى پێزانین ل دۆر ئه‌ڤێ مێژوویا تراژیدى یا پرى ده‌ستكه‌فت هه‌بن".
رێوار محه‌مه‌د ره‌شید
