پارێزگارێ دهۆكێ: ب كریار دێ ل سه‌ر خزمه‌تكرنا خه‌لكێ خوه د به‌رده‌وام بین
دهۆك –KDP.info- پارێزگارێ دهۆكێ ئه‌ڤرۆ رۆژا ئێكشه‌مبى پرۆژه‌كێ قێركرن و ڤه‌كرنا جادان د ناڤ سه‌نته‌رێ باژێرێ دهۆكێ دا ڤه‌كر و د هه‌مان ده‌م دا به‌رێ بنیاتى ژى بۆ بجهئینانا پرۆژێ جاده‌كا 30 مه‌ترى د ناڤ باژێرێ ناڤهاتى دا دانا و گۆت: "سوبه‌هى ژى دێ سه‌ره‌دانا قه‌زا ئاكرێ كه‌ین بۆ دانانا به‌رێ بنیتى بۆ چه‌ندین پرۆژێن نوى یێن خزمه‌تگۆزارى".
پ.د.عه‌لى ته‌ته‌ر، پارێزگارێ دهۆكێ ئاشكرا كر كو ل دووڤ راسپارده و پشته‌ڤانیا به‌رده‌وام یا جه‌نابێ سه‌رۆكێ حكومه‌تا هه‌رێما كوردستانێ ئه‌ڤه بۆ ده‌مێ سێ حه‌فتیانه ل دووڤ ئێك ئه‌و به‌رێ بنیاتى بۆ بجهئینانا پرۆژان ل ده‌ڤه‌رێن جوداجودا یێن پارێزگه‌ها دهۆكێ ددانن، هه‌روه‌سا ئه‌و پرۆژێن ژ قووناغا بجهئینانێ ب دووماهى ژى هاتین دهێنه ڤه‌كرن و دكه‌ڤنه د خزمه‌تا خه‌لكى دا، ئه‌ڤرۆ جاره‌كا دى ژى د ناڤ سه‌نته‌رێ باژێرێ دهۆكێ دا ژماره‌كا جاده و كۆلانێن نوى هاتنه ڤه‌كرن یێن كو ژ قووناغا بجهئینانێ ب دومماهى هاتین كو پرۆژێ قێركرنا جاده و كۆلانان بوو، هه‌روه‌سا د هه‌مان ده‌م دا به‌رێ بنیاتى بۆ پرۆژێ جاده‌كا 30 مه‌ترى ژى ل باژێرێ ناڤهاتى هاته دانان و گۆت: "دێ بزاڤێ كه‌ین د سه‌ره‌دانا خوه یا ئه‌ڤرۆ دا بۆ ده‌رگه‌هێ باژێرێ دهۆكێ دگه‌ل باژێرێ مووسل گوهۆڕینه‌كێ ل وى ده‌رگه‌هى بكه‌ین و سمایه‌كێ جوانتر بده‌ینه ده‌رگه‌هێ باژێرێ دهۆكێ".
پارێزگارێ دهۆكێ خویا كر كو ئه‌و جادا 30 مه‌ترى یا ئه‌ڤرۆ به‌رێ بنیاتى بۆ هاتیه‌دانان جاده‌كا گه‌له‌ك گرنگه ئه‌ڤ جاده و دگه‌ل جادێن دى یێن 30 مه‌ترى یێن كو د رۆژێن بورى دا د ناڤ باژێرێ دهۆكێ دا هاتینه ڤه‌كرن هه‌تا راده‌یه‌كى دێ قه‌ره‌بالغا ترۆمبێلان كێم كه‌ت و گۆت: "ل دووڤ پێدڤیا ده‌ڤه‌رێن پارێزگه‌ه دهۆكێ بێ جوداهى و ب یه‌كسانى پرۆژێن خزمه‌تگۆزارى ل هه‌مى ده‌ڤه‌ران دهێنه بجهئینان و سوبه‌هى ژى ژڤانه سه‌ره‌دانا قه‌زا ئاكرێ بكه‌ین بۆ دانانا به‌رێ بنیاتى بۆ چه‌ندین پرۆژێن نوى یێن خزمه‌تگۆزارى و رۆژێن دووڤ دا ژى بۆ هه‌مان مه‌ره‌م دێ سه‌ره‌دانا چه‌ندین ناحیان كه‌ین و ئه‌ڤ پرۆسه دێ ژ لایێ مه ڤه یا به‌رده‌وام بیت و ب كریار دێ ل سه‌ر خزمه‌تكرنا خه‌لكێ خوه د به‌رده‌وام بین".
رێوار محه‌مه‌د ره‌شید
