ژماره‌كا پرۆژان ل زاویته و مانگێشكێ كه‌فتنه د بوارێ بجهئینانێ دا
دهۆك-KDP.info- سكرتێرێ رۆژنامه‌ڤانى یێ پارێزگارێ دهۆكێ دیار كر كو د به‌رده‌وامیا ڤه‌كرن و بجهئینانا پرۆژێن نوى یێن خزمه‌تگۆزارى دا ل پارێزگه‌ها دهۆكێ ئه‌ڤرۆ رۆژا پێنجشه‌مبى 19/1/2023 پ.د.عه‌لى ته‌ته‌ر، پارێزگارێ دهۆكێ ب گوژمێ پترى چار ملیار دیناران به‌رێ بنیاتى بۆ ژماره‌كا پرۆژان ل هه‌ر ئێك ژ ناحیا زاویته و مانگێشكێ یێن سه‌ر ب قه‌زا دهۆكێ ڤه دانا و د هه‌مان ده‌م دا ژماره‌كا پرۆژان ژى ل ناحیێن ناڤهاتى هاتنه ڤه‌كرن.
ملله‌ت عسمه‌ت، سكرتێرێ رۆژنامه‌ڤانى یێ پارێزگارێ دهۆكێ دیار كر كو د چارچوڤێ وان پرۆژێن نوى یێن خزمه‌تگۆزارى دا یێن كو ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ دهێنه ڤه‌كرن و بجهئینان ئه‌ڤرۆ پارێزگارێ دهۆكێ به‌رێ بنیاتى ب گوژمێ چار ملیار و 773 ملیۆن دیناران بۆ ژماره‌كا پرۆژێن خزمه‌تگۆزارى د بوارێن جوداجودا دا ل هه‌ر ئێك ژ ناحیا زاویته و مانگێشكێ یێن سه‌ر ب قه‌زا دهۆكێ ڤه دانا ژ وان پرۆژان ژى پرۆژێ چێكرن و سه‌خبێركرنا رێیێن ناڤخۆ ل باگێرا و مانگێشكێ، هه‌روه‌سا پرۆژێ سه‌خبێركرنا رێیا جادا مانگێشك بۆ گوندێ به‌رۆشكا سه‌عدینى و ملهمبانێ و راس ئه‌لعه‌ین و ئاله‌كینا و ئوزمان و سه‌رنافكێ، د هه‌مان ده‌م دا به‌رێ بنیاتى بۆ چێكرنا رێیێ ژ جادا سه‌ره‌كى بۆ گوندێ ملهمبانێ و قۆناغا دووێ یا سه‌خبێركرنا رێیا گوندێ (دێرگژنیك – بێسفكێ) و سه‌خبێركرنا رێیێن ناڤخۆ ل گوندێ باجلۆرێ ب درێژاهیا 1.2كم هاته دانان.
ناڤهاتى خویا كر كو پارێزگارێ دهۆكێ د چارچوڤێ سه‌ره‌دانا خوه دا بۆ هه‌ر ئێك ژ ناحیا زاویته و مانگێشكێ به‌رێ بنیاتى بۆ چێكرنا پێنج بیرێن ل سه‌ر ئه‌رد ل گوندێن (باجلۆر، به‌ندا، به‌رۆشكا سێڤێ، ئاله‌كینا، غلبوك)ێ و چێكرنا جوكا گوندێ مێسكێ و چێكرنا چار بركێن كونكریتى ل گوندێن (خازیاڤا، چه‌مان، پیرموس، میمه دلى) و بركا كونكریتى ل گوندێ زێوكا عه‌بوى و بیره‌كا ل سه‌ر ئه‌رد دگه‌ل بركه‌كا كونكریتى ل هه‌مان گوند دانا، د هه‌مان ده‌م دا به‌رێ بنیاتى بۆ پرۆژێ سه‌خبێركرنا رێیا گوندێن (بانه‌سور، شاوریكێ، بروحه‌جه‌را، ناڤه‌دارا، ئه‌لندكێ، چرانێ، گه‌لناسكێ و پرۆژێ سه‌خبێركرنا رێیا جادا بێشینكێ و بابوخكێ و دێرگژنیك هاته دانان.
رێوار محه‌مه‌د ره‌شید
