سەرۆکی حکوومەت لەگەڵ وەزیری پیشەسازی و بازرگانی بەحرەین کۆبووەوە

هەولێر-KDP.info- ئەمڕۆ چوارشەممە 1/18 مەسروور بارزانی سەرۆکی حکوومەتی هەریمی کوردستان لە داڤۆس لەگەڵ عەبدوڵلا بن عادل فەخرۆ، وەزیری پیشەسازی و بازرگانی بەحرەین کۆبووەوە.

لە کۆبوونەوەکەدا باس لە پەرەپێدانی پەیوەندییەکانی نێوان هەرێمی کوردستان و شانشینی بەحرەین کرا، بەتایبەتی لە بوارەکانی برەودان بە وەبەرهێنان و پیشەسازی و کشتوکاڵ و ئاڵوگۆڕی بازرگانی.

وەزیری پیشەسازی و بازرگانی بەحرەین، سڵاو و ڕێزی جێنشین و سەرۆک وەزیرانی بەحرەینی شێخ سەلمان بن حەمەد ئال خەلیفە بە سەرۆکی حکوومەت گەیاند و خواستی وڵاتەکەی بۆ پتەوکردنی پەیوەندییەکان لەگەڵ هەرێمی کوردستان دووپات کردەوە. وەزیری پیشەسازی و بازرگانی بەحرەین ئاماژەشی بەوەدا کە بڕیارە لەگەڵ شاندێکی گەورەی بازرگانی، سەردانی هەرێمی کوردستان بکات.

سەرۆکی حکوومەت ئامادەیی هەرێمی کوردستانی بۆ برەودان بە پەیوەندییەکان لەگەڵ شانشینی بەحرەین لە هەموو بوارەکاندا دەربڕی.