كاروانێ ئاڤه‌دانیێ ل هه‌مى ده‌ڤه‌ران بێ جوداهى یێ به‌رده‌وامه
دهۆك –KDP.info- سكرتێرێ رۆژنامه‌ڤانى یێ پارێزگارێ دهۆكێ دیار كر كو ئه‌و سۆزا كابینا نه‌هێ یا حكومه‌تا هه‌رێما كوردستانێ دایه خه‌لكێ خوه كو دێ كاروانێ ئاڤه‌دانیێ ل هه‌مى ده‌ڤه‌ران بێ جوداهى یێ به‌رده‌وام بیت بجهئینایه و بۆ ده‌مێ چه‌ند رۆژانه به‌رده‌وام پرۆژێن خزمه‌تگۆزارى ل ده‌ڤه‌رێن جوداجودا یێن پارێزگه‌ها دهۆكێ دكه‌ڤنه د قووناغا بجهئینانێ دا، ئه‌ڤرۆ رۆژا سێشه‌مبى 17/1/2023 ژى پ.د.عه‌لى ته‌ته‌ر، پارێزگارێ دهۆكێ به‌رێ بنیاتى ب گوژمێ پترى 46 ملیار دیناران بۆ ژماره‌كا پرۆژێن خزمه‌تگۆزارى ل هه‌ر ئێك ژ ناحیا (بامه‌رنى و كانى ماسێ) ل سنوورێ قه‌زا ئامێدیێ دانا.
ملله‌ت عسمه‌ت، سكرتێرێ رۆژنامه‌ڤانى یێ پارێزگارێ دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو ب مه‌ره‌ما گه‌هاندنا خزمه‌تگۆزاریێن زێده‌تر بۆ ده‌ڤه‌رێن جوداجود یێن پارێزگه‌ها دهۆكێ ئه‌ڤرۆ پ.د.عه‌لى ته‌ته‌ر، پارێزگارێ دهۆكێ به‌رێ بنیاتى ب گوژمێ 46 ملیار و 907 ملیۆن و 37 هزار دینارن بۆ ژماره‌كا پرۆژێن خزمه‌تگۆزارى ل هه‌ر ئێك ژ ناحیا (بامه‌رنى و كانى ماسێ) ل سنوورێ قه‌زا ئامێدیێ دانا و د هه‌مان ده‌م دا پرۆژێ ئاڤا ستراتیژى ژ ئینیشكێ بۆ بامه‌رنێ ڤه‌كر و گۆت: " ئه‌و پرۆژێن ئه‌ڤرۆ به‌رێ بنیاتى بۆ ژ لایێ پارێزگارێ دهۆكێ ڤه هاتیه دانان، پرۆژێ چێكرنا رێیێن ناڤخۆ ل گوندێ كانیكا و ئه‌ره‌دنا مه‌سیحیا، هه‌روه‌سا پرۆژێ رێیێن گوندێ وه‌رمێلێ، بابیرێ، زێوه شێخ پیراموس، غلبیشێ و پرۆژێ چێكرن و سه‌خبێركرنا رێیا سه‌نته‌رێ ناحیا بامه‌رنێ و پرۆژێ چێكرن و سه‌خبێركرنا رێیێن ناڤخۆ ل ناحیا ناڤهاتى، د هه‌مان ده‌م دا به‌رێ بنیاتى بۆ چێكرنا رێیا گوندێ بیدهێ ژى هاته دانان".
ناڤهاتى ئاماژه دا وێ چه‌ندێ كو هه‌ر د چارچۆڤێ ڤێ سه‌ره‌دانێ دا پارێزگارێ دهۆكێ به‌رێ بنیاتى بۆ پرۆژێن كولانا بیره‌كا ئاڤێ دگه‌ل چێكرنا عمباره‌كا 60 مه‌تر سێجا بۆ گوندێ كێسته و كرین و دابینكرنا پوسته‌رێ په‌مپێن ئاڤێ بۆ پرۆژێ سه‌ره‌كى یێ ناحیا كانى ماسێ دگه‌ل گه‌هاندنا هێلا سه‌ره‌كى یا ئاڤێ بۆ عمبارا نوى یا هه‌مان ناحیه، دگه‌ل كولانا بیره‌كا ئاڤێ بۆ گوندێ دێرێ و دابینكرنا ماتورێن ئاڤێ و سه‌خبێركرنا فلته‌را دگه‌ل چێكرنا تورا ئاڤێ ل كومه‌لگه‌ها بریفكا و چێكرنا عمباره‌كا ئاڤێ ل كومه‌لگه‌ها ناڤهاتى و سه‌خبێركرنا تورا ئاڤێ ل راڤینا دانا، هه‌روه‌سا د هه‌مان ده‌م دا به‌رێ بنیاتى بۆ پرۆژێ دانانا ئونلودا بۆ سه‌ر فیده‌رێن 11KVل كانى ماسێ و گه‌هاندنا هێلا كاره‌بێ بۆ ژماره‌كا مالێن نوى ل گوندێ قومریێ و دشێشێ و ڤه‌گوهاستنا هێلا كاره‌بێ ل گوندێ كێسته‌ل فیده‌رێ بێگوڤا بۆ سه‌ر فیده‌رێ ئاسته‌نگێ هاته دانان، زێده‌بارى ڤێ چه‌ندێ به‌رێ بنیاتى بۆ سه‌خبێركرنا رێیا هه‌ر ئێك ژ گوندێ خشخاشا و چه‌م سه‌یدا و بازێ و تیله‌رێ و هرۆر و بازیف و میركا چیا و قوونغا دووێ یا رێیا چه‌م سه‌یدا ژى هاته دانان.
ل دووماهیێ سكرتێرێ رۆژنامه‌ڤانى یێ پارێزگارێ دهۆكێ خویا كر كو د هه‌مان ده‌م دا پارێزگارێ دهۆكێ سه‌ره‌دانا كومه‌لگه‌ها سه‌رزێرى یا سنوورى ژى كر و به‌رێ بنیاتى بۆ قووناغا ئێكێ یا پرۆژێ چێكرنا رێیا سه‌رزێرى ب درێژاهیا هه‌شت كلیۆمه‌تران دانا.
رێوار محه‌مه‌د ره‌شید
