پەیامی پیرۆزبایی سەرۆك بارزانی بەبۆنەی یادی 24 ساڵەی دامه‌زراندنی كوردستان تی ڤی
هەولێر-KDP.info- سه‌رۆك بارزانی له ساڵوه‌گه‌ڕی دامه‌زراندنی ده‌زگای سه‌ته‌لایه‌تی كوردستان، په‌یامێكی پیرۆزبایی ڕاگه‌یاند و دووپاتی كرده‌وه پێویستە كوردستان تی ڤی بە وزە و تینێکی زیاترەوە بەردەوام بێت لە پابەندبوون بە کوولتووری کوردایەتی و نیشتیمانپەروەری و پێکەوەژیان ئەویش له‌ژێر رۆشنایی رێبازی بارزانیی نەمر.
ده‌قی په‌یامی سه‌رۆك مه‌سعود بارزانی:
پەیامی پیرۆزبایی سەرۆك بارزانی بەبۆنەی یادی 24 ساڵەی دامه‌زراندنی كوردستان تی ڤی
بەناوی خودای بەخشندە و میهرەبان
بۆ بەڕێزان سەرپەرشتیار و بۆردی بەڕێوەبردن و سەرجەم كارمەندانی خۆشەویستی دەزگای سەتەلایتی کوردستان
بەبۆنەی 24 ساڵەی پەخشی كوردستان تی ڤی پیرۆزباییەكی گەرمتان لێدەكەم و هیوای بەردەوامیی و سەركەوتنتان بۆ دەخوازم لەو ئەركە پیرۆزەتان كە خزمەتکردنە بە مێژوو و فەرهەنگ و کۆمەڵگەی کوردستان.
جێگەی خۆشحاڵیە کوردستان تی ڤی هەر لەسەرەتای كاركردنیدا بە متمانە و ڕاستگۆیی ئەو ئەركەی لەسەرشانی بووه جێبەجێی كردووه و بووە جێگەی سەرنجی بینەرانی و هاووڵاتیان، هەروەها بووە پردێكی پەیوەندیی لەنێوان خەڵكی كوردستان لە ناوخۆ و دەرەوە.
پێویستە كوردستان تیڤی بە وزە و تینێکی زیاترەوە بەردەوام بێت لە پابەندبوون بە کوولتووری کوردایەتی و نیشتیمانپەروەری و پێکەوەژیان ئەویش له‌ژێر رۆشنایی رێبازی بارزانیی نەمر.
ئەو چاوەڕوانییە لە دەزگەی سەتەلایەتیی کوردستان هەیە کە وەک هەمیشە مینبەری هەموو خەباتگێڕ و هاووڵاتی و پێکهاتەکانی کوردستان بێت و بەشێوازی گونجاو گرنگی بە مێژووی خەباتی خەڵكی كوردستان و ئێستا و ئاییندەی میللەتەكەمان بدات.
هیوای سەرکەوتنتان بۆ دەخوازم
مسعود بارزانی
17ی کانوونی دووەمی 2023
