پاركه‌ك ل سه‌ر رووبه‌رێ 46 دونه‌مێن ئه‌ردى دێ ل دهۆكێ هێته چێكرن
دهۆك –KDP.info- ژڤانه ل دووماهیا ڤێ هه‌یڤێ پیشه‌سازیا ترۆمبێلان ل باژێرێ دهۆكێ بۆ جهێ وێ یێ نوى ل ئالۆكا بهێته ڤه‌گوهاستن و ل جهێ وێ یێ كه‌ڤن پاركه‌كا گشتى بهێته چێكرن.
ئیسماعیل مسته‌فا، به‌رپرسێ ڕاگه‌هاندنێ ل سه‌رۆكاتیا باژێرڤانیا دهۆكێ بۆ ماڵپه‌رێ فه‌رمیێ پارتى دیموكراتى كوردستان دیار كر كو بڕیار هاتیه دان ل دووماهیا ڤێ هه‌یڤێ پیشه‌سازیا ترۆمبێلان ژ تاخێ به‌رۆشكێ یێ باژێڕێ دهۆكێ بۆ جهێ وێ یێ نوى كو ل ئالۆكا ب شێوه‌یه‌كێَ سه‌رده‌میانه هاتیه چێكرن بهێته ڤه‌گوهاستن، دووماهى ژڤان ژى بۆ ڤه‌گوهاستنا ڤێ پیشه‌سازیێ رۆژا 26/1/2023 یه و پشتى ڤى ژڤانى هه‌ر كه‌سێ ل جهێ كه‌ڤن بمینیت دێ ل دووڤ یاسایێ سه‌ره‌ده‌رى ل گه‌ل هێته‌كرن و گۆت: "جهێ پیشه‌سازیا كه‌ڤن یا ترۆمبێلان كو رووبه‌رێ وێ 46 دونه‌مێن ئه‌ردى نه دێ بیته پاركه‌كا گشتى و پشتى ئه‌ڤ پیشه‌سازیه دهێته ڤه‌گوهاستن دێ ده‌ست ب دیزاینا ڤێ پاركێ هێته‌كرن بۆ وێ چه‌ندێ بۆدجا پێدڤى بۆ بهێته ته‌رخانكرن و بكه‌ڤیته د قووناغا بجهئینانێ دا".
__2023_01_16_h15m0s14__ER.jpg)
ژ ئالیێ خوه ڤه فه‌لاح حاجى، رێڤه‌به‌رێ ڕاگه‌هاندنێ ل رێڤه‌به‌ریا گشتى یا وه‌به‌رهێنانێ ل پارێزگه‌ها دهۆكێ بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو پرۆژێ كۆمه‌لگه‌ها پیشه‌سازیا خزمه‌تگۆزاریێن ترۆمبێلان ب دووماهى هاتیه كو دێ پیشه‌سازیا كه‌ڤن یا ترۆمبێلان ل باژێرێ دهۆكێ بۆ ڤى جهێ نوى هێته ڤه‌گوهاستن و گۆت: "ئه‌ڤ پیشه‌سازیه ب شێوه‌یه‌كێ سه‌رده‌مانه ب گوژمێ پترى 62 ملیۆن دۆلاران ل سه‌ر رووبه‌رێ 690 هزار مه‌ترێن دووجا یێن ئه‌ردى هاتیه بجهئینان كو پترى دو هزار و 378 جهێن پیشه‌سازى یێن جوراوجور بخوه‌ڤه دگریت".
رێوار محه‌مه‌د ره‌شید
