وه‌به‌رهێنه‌رێن بیانى پرۆژان ل زاخۆ ئه‌نجام دده‌ن
دهۆك –KDP.info- رێڤه‌به‌رێ گشتى یێ وه‌به‌رهێنانێ ل ئیدارا سه‌ربه‌خۆ یا زاخۆ دیار كر كو پشتى ئیدارا سه‌ربه‌خۆ یا زاخۆ هاتیه راگه‌هاندن چه‌ندین پرۆژێن وه‌به‌رهێنانێ ل سنوورێ ڤێ ئیدارێ كه‌فتینه د وارێ بجهئینانێ دا و چه‌ندین وه‌به‌رهێنه‌رێن دى ژى نوكه چاڤه‌ڕێ وه‌رگرتنا مۆله‌تێ نه بۆ بجهئینانا پرۆژان.
ئه‌ندازیار جه‌گه‌رخوین تاهر، رێڤه‌به‌رێ گشتى یێ وه‌به‌رهێنانێ ل ئیدارا سه‌ربه‌خۆ یا زاخۆ بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو ئه‌و ئاسانكاریێن ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ د چارچۆڤێ یاسایێ دا بۆ وه‌به‌رهێنه‌ران ب شێوه‌یه‌كێ گشتى دهێنه‌كرن بوویه ئه‌گه‌ره‌ك كو ژ بلى بجهئینانا پرۆژان ژ لایێ وه‌به‌رهێنه‌رێن ناڤخۆ ڤه، وه‌به‌رهێنه‌رێن بیانى ژى بۆ بجهئینانا پرۆژان قه‌ستا سنوورێ ئیدارا سه‌ربه‌خۆ یا زاخۆ بكه‌ن و گۆت: "نوكه پرۆژه‌كێ چاندنێ ل سه‌ر هزار دونه‌مێن ئه‌ردى ژ لایێ وه‌به‌رهێنه‌ره‌كێ ئیماراتى ڤه ب گوژمێ دوو ملیۆن و 900 هزار دۆلاران ل نێزیك ئه‌كادیمیا له‌شكرى ل سنوورێ ئیدارا ناڤهاتى د قووناغا بجهئینانێ دایه كو هه‌ر ده‌مێ ئه‌ڤ پرۆژه ب دووماهى هات دوو هزار و 500 ده‌لیڤێن كارى یێن وه‌رزى دێ بۆ جۆتیاران په‌یدابن، سه‌ره‌رایى ڤێ چه‌ندێ په‌یمانگه‌هه‌كا ئه‌كادیمى ژى دێ د ناڤ ڤى پرۆژه‌ى دا هێته ڤه‌كرن و 50 ده‌لیڤێن كارى دێ بۆ ده‌رچوویێن زانستێن چاندنێ ل زانكۆ و په‌یمانگه‌هان ل ڤێ په‌یمانگه‌هێ په‌یدابن كو ئه‌ڤ په‌یمانگه‌هه دێ بیته سه‌نته‌رێ ڤه‌كۆلینان بۆ به‌رهه‌مێن ڤى پرۆژه‌ى".
ناڤهاتى ئاماژه دا وێ چه‌ندێ كو ل هه‌یاما بوورى وه‌به‌رهێنه‌ره‌كێ تورك ژى داخوازا بجهئینانا پرۆژه‌كێ پیشه‌سازى ل سنوورێ ئیدارا سه‌ربه‌خۆ یا زاخۆ كریه و رێڤه‌ریا وان ژى مه‌رج و رێنما و یاسایێن وه‌به‌رهێنانێ ل هه‌رێما كوردستانێ بۆ وى وه‌به‌رهێنه‌رى دیاركرینه و هه‌ر ده‌مێ خواست ده‌ست بجهئینانا ڤى پرۆژه‌ى بكه‌ت دێ دچارچۆڤێ یاسایێ دا هه‌مى ئاسانكاریان بۆ ئه‌نجامده‌ن و گۆت: "رێڤه‌به‌ریا گشتى یا وه‌به‌رهێنانێ ل ئیدارا سه‌ربه‌خۆ یا زاخۆ پلانه‌كا باش بۆ سالا 2023 دانایه، به‌لێ هنده‌ك پرۆژێن گه‌له‌ك مه‌زن د ناڤ ڤێ پلانێ دا هه‌نه، ئه‌م دێ پێدڤى ب وه‌به‌رهێنه‌رێن بیانى بین بهێن ڤان پرۆژان جێبه‌جێ بكه‌ن ژوان پرۆژان، د پلانا مه‌دایه هێلا ئاسنى یا شه‌مه‌نده‌فه‌رێ یا هه‌لاویستى ل سه‌ر خابیرێ زاخۆ ب درێژاهیا 13 كیلۆمه‌تران چێكه‌ین وه‌كو پرۆژه‌كێ گه‌شتیارى كو دێ ژ پرا ده‌لال ده‌ستپێكه‌ت و هه‌تا دووماهیا زاخۆ دێ یا به‌رده‌وام بیت، سه‌ره‌رایى ڤێ چه‌ندێ ژ بلى مه‌ره‌مێن گه‌شتیارى دێ وه‌كو ئامرازه‌كێ هاتنوچوونێ بۆ وه‌لاتیان ژى هێته بكارئینان، ژ ئالیێ خوه‌ڤه سه‌رۆكێ ده‌سته‌یا گشتى یا وه‌به‌رهێنانێ ل هه‌رێما كوردستانێ ژى سۆز دایه مه كو دێ هه‌مى بزاڤان كه‌ن ژماره‌كا باش یا وه‌به‌رهێنه‌رێن بیانى ل دۆر ڤى پرۆژه‌ى ئاگه‌هداربكه‌ن بۆ وێ چه‌ندێ وه‌به‌رهێنه‌ره‌ك ڤى پرۆژه‌ى جێبه‌جێ بكه‌ت".
ل دووماهیێ ژى رێڤه‌به‌رێ گشتى یێ وه‌به‌رهێنانێ ل ئیدارا سه‌ربه‌خۆ یا زاخۆ خویا كر كو نوكه 74 پرۆژه د هه‌مى قووناغان دا ل به‌ر ده‌ستێ رێڤه‌به‌ریا وانه بۆ وێ چه‌ندێ مۆله‌تا وه‌به‌رهێنانێ وه‌رگرن، ژ ڤى سه‌رجه‌مى مه داخوازا ته‌رخانكرنا پارچێن ئه‌ردى بۆ 33 پرۆژان ژ لایه‌نێن په‌یوه‌ندیدار كریه، هه‌كه ئه‌ڤ پارچێن ئه‌ردى هاتنه ته‌رخانكرن دێ مۆله‌تا وه‌به‌رهێنانێ وه‌رگرن بۆ بجهئینانا ڤان پرۆژان، ژ بلى ڤێ چه‌ندێ نێزیكى 20 پرۆژان ژى وان په‌سه‌ندا ده‌ستپێكى بۆ كریه و دێ داخوازا ته‌رخانكرنا ئه‌ردى بۆ ڤان پرۆژان ژى هێته‌كرن داكو ئه‌و ژى مۆله‌تێ وه‌رگرن و گۆت: "ئێكه‌م پرۆژێ وه‌به‌رهێنانێ د سالا 2023 دا به‌رى حه‌فتیه‌كێ مۆله‌ت ژ رێڤه‌به‌ریا مه وه‌رگرتیه كو پرۆژه‌كێ وه‌رزشى یه ب گوژمێ ملیۆنه‌ك و 200 هزار دۆلاران دێ ل سنوورێ ئیدارا سه‌ربه‌خۆ یا زاخۆ هێته بجهئینان".
رێوار محه‌مه‌د ره‌شید
